«Չեմ ուզում պատասխանել». թիվ 19 պոլիկլինիկայի փոխտնօրենը «կոռումպացված» տնօրենի դեմ բոյկոտին չի միացել

Երևանի Մալաթիա-Սեբաստիա վարչական շրջանի թիվ 19 պոլիկլինիկայում կրքերը չեն հանդարտվում: Բուժաշխատողները շարունակում են պահանջել տնօրեն Սամվել Սարգսյանի հրաժարականը՝ նշելով, որ չեն ցանկանում աշխատել կոռումպացված տնօրենի հետ:

Նրանք արդեն մի քանի օր է՝ գործադուլ են հայտարարել: 

 NEWSPRESS.am-ը փորձեց կապ հաստատել Սամվել Սարգսյանի հետ, սակայն ընդունարանի հեռախոսը չպատասխանեց: Ավելի ուշ հաջողվեց խոսել պոլիկլինիկայի բուժական մասի գծով փոխտնօրեն Սուսաննա Նալչադյանի հետ: Նա հաստատեց լուրն այն մասին, որ բուժաշխատողները գործադուլ անում են, սակայն, եթե սկզբի օրերին ընդհանրապես հրաժարվում էին աշխատելուց, այժմ քաղաքացիների այցելությունների դեպքում բարձրանում և սպասարկում են:

«Այս պահին իրավիճակն ավելի հանդարտ է, բուժաշխատողները սպասարկում են հիվանդներին»,-մեզ հետ զրույցում ասաց Սուսաննա Նալչադյանը:

Ճշտող հարցին, թե նա ևս միացե՞լ է տնօրենի դեմ բոյկոտին, փոխտնօրեն Նալչադյանը պատասխանեց:

«Ո՛չ, ես չեմ միացել»:

Հարցին, թե կարծում է՝ տնօրենի դեմ հնչեցրած մեղադրանքներն անարդարացի՞ են, նա պատասխանեց.

«Գիտեք, ես չեմ ուզում պատասխանել նման հարցերի... և հետո հիմա ես աշխատում եմ ու իմ մոտ հերթ է արդեն գոյացել, կներեք»,-ասաց Նալչադյանը:

Հ.Գ. Իհարկե, փոխտնօրենը կարող է և չմիանալ բուժաշխատողներին նաև այն պարզ պատճառով, որ ինքը ևս ղեկավարության մաս է կազմում ու շարունակում է նույն տեմպով աշխատել: Սակայն հարկ է նկատել նաև, որ մինչ օրս բուժաշխատողները ևս աշխատելիս են եղել, իրենց իսկ խոսքով, «կոռումպացված» ղեկավարի հետ և չեն բողոքել իրենց վիճակից: Ամեն ինչ գուցե այդպես էլ շարունակվեր, եթե Երևանի ավագանու «Ելք» խմբակցության անդամներ Դավիթ Խաժակյանը, Անի Խաչատրյանը, Անի Սամսոնյանը չայցելեին բուժհիմնարկ և ջրի երես չհանեին տեղի ունեցող չարաշահումները:

Հարկ ենք համարում նաև նշել, որ այդ այցելության ժամանակ, չնայած բազում հարցերին, այդ նույն բուժաշխատողները փութաջանորեն արդարացնում էին իրենց տնօրենին՝ թերևս փրկելով նաև իրենց կաշիները, քանի որ, ըստ էության, տարիների ընթացքում նրանք քողարկել էին տնօրենի անօրինական աշխատանքն ու դարձել հանցակից...