ԵՄ ծրագրերը Հայաստանի բուհերի միջազգայնացման գործընթացը խթանելու արդյունավետ գործիք են

Հայաստանը ԵՄ բարձրագույն կրթության տարածքի մաս է, իսկ ԵՄ ծրագրերը Հայաստանի բուհերի միջազգայնացման գործընթացը խթանելու արդյունավետ գործիք են:Այս մասին, այսօր՝ նոյեմբերի 18-ին, Կրթության, աուդիովիզուալ եւ մշակութային գործադիր գործակալության Էրազմուս+ բարձրագույն կրթություն-Միջազգային կարողությունների զարգացում բաժնի ծրագրային համակարգող Խոսե Գուտիերեսի, նույն գործակալության` Հայաստանում իրականացվող ծրագրերի պատասխանատու Ալմուդենա Սայենս դե Միերայի եւ Հայաստանում Էրազմուս+ ծրագրի ազգային գրասենյակի համակարգող Լանա Կառլովայի հետ հանդիպման ժամանակ նշել է ՀՀ կրթության եւ գիտության նախարար Արմեն Աշոտյանը:

ԿԳՆ-ից հայտնում են, որ նախարարը վերջիններիս է ներկայացրել Հայաստանի բարձրագույն կրթության ոլորտում իրականացվող բարեփոխումները, դրանց արդյունքները, Երեւանում մայիսին տեղի ունեցած Բոլոնիայի նախարարական գագաթաժողովի շրջանակում ընդունած Երեւանի հռչակագրի հիմնական շեշտադրումները բուհական ինքնավարության վերաբերյալ: Արմեն Աշոտյանն ընդգծել է, որ ԵՄ ծրագրերը Հայաստանի բուհերի միջազգայնացման գործընթացը խթանելու արդյունավետ գործիք են`  կարեւորելով, որ հատկապես վերջին տարիներին ԵՄ ծրագրերում մասնակցության ցուցանիշի ակտիվությամբ Արեւելյան գործընկերության անդամ երկրների շարքում Հայաստանը դարձել է տարածաշրջանի առաջատարը. «Արձանագրված արդյունքները վկայում են, որ Հայաստանը ԵՄ բարձրագույն կրթության տարածքի մաս է, հետեւաբար սկսված բարեփոխումներն այդ ուղղությամբ շարունակվելու են»,- նշել է Ա. Աշոտյանը` ընդգծելով, որ ՀՀ բուհերի համար ԵՄ կողմից իրականցվող ծրագրերից, հատկապես «Տեմպուս» եւ «Էրազմուս Մունդուս» ծրագրերը ուսանողների եւ դասախոսների շարժունության, բուհերի միջազգայնացման տեսանկյունից  բացառիկ հաջողություն են ունեցել: Այդ համատեքստում նախարարը կարեւորել է այդ ծրագրերում ՀՀ բուհերի ներգրավվածության, ինչպես նաեւ Էրազմուս+ ծրագրերի թափանցիկության,  դրանք շահառուների հասանելի դարձնելու խնդիրը:

Խոսե Գուտիերեսն իր հերթին անդրադարձել է վերոնշյալ ծրագրերի շրջանակում բուհերի միջազգայնացման, միջբուհական ուղղակի կապերի զարգացման եւ  Էրազմուս+  նախագծին հայկական բուհերի մասնակցությամբ իրականացվող  ծրագրերին: Նա կարեւորել է վերոնշյալ ծրագրերի արդյունավետության բարձրացման հարցը` ընդգծելով, որ դրանք լավ գործիք են` բարձրագույն կրթության ոլորտում կարողությունների հզորացման, ուսանողական շարժունության եւ միջբուհական համագործակցության, բուհական ինքնավարության ապահովման առկա մեխանիզմների տեսանկյունից:

Հանդիպման ընթացքում քննարկվել են նաեւ նոր կրթական ծառայությունների մատուցման, փոխանակման ծրագրերի, դրանցում ներգրավված երկրների համար հավասար սկզբունքների կիրառման, «Հորիզոն 2020» ծրագրին Հայաստանի մասնակցության եւ այլ հարցեր:  Կողմերն անդրադարձել են նաեւ Հայաստանում Էրազմուս+ ծրագրի ազգային գրասենյակի կազմակերպաիրավական կարգավիճակի հարցին:

Նշենք, որ Խոսե Գուտիերեսի եւ Ալմուդենա Սայենս դե Միերայի` առաջին անգամ Հայաստան կատարվելիք այցելության շրջանակներում նախատեսվում են մի շարք միջոցառումներ՝ տեղեկատվական օր Երեւանում, հանդիպում Էրազմուս+ ծրագրի բարձրագույն կրթության բարեփոխումների փորձագետների հետ, Տեմպուսի ընթացիկ ծրագրերի մշտադիտարկում եւ ծանոթություն Էրազմուս+ կարողությունների զարգացմանը միտված նոր ծրագրերի հայաստանյան ներկայացուցիչների հետ։