Շտապօգնության մեքենան ասեղ չի, որ տանես մի տեղ պահես. Մարուքյան կարծում է, որ միայն Գրիգորյանը չէ, որ պետք է պատասխան տա

Բոլորս ցնցված ենք և շոկի մեջ ենք: Այդ մասին Ազգային ժողովում հայտարարեց ԱԺ «Ելք» խմբակցության պատգամավոր Էդմոն Մարուքյանը:

«Կոռուպցիայի և բանակը թալանելու մասին շատ է խոսվել, բայց այս դեպքը տարբերվում է, քանի որ սա կոնկրետ պատերազմական գործողությունների արդյունք դրամահավաքի և անգամ դպրոցներից կազմակերպված աջակցության թալան է, ոչ թե կոնկրետ բանակը որպես պետական ինստիտուտ, բանակի թալան, որը մենք ամենախիստ կերպով դատապարտում ենք: Գիտեք՝ քրեական գործ կա հարուցված, նաև ձերբակալված է պարոն Գրիգորյանը: Ես կարծում եմ՝ այլ կարծիք չի կարող լինել, քան այն, որ օրենքի ամբողջ խստությամբ պետք է մեղավորները պատասխանատվության ենթարկվեն»,- ասաց պատգամավորը: 

Մարուքյանը երկու շեշտադրում առանձնացրեց. «Ապրիլյան պատերազմի օրերին Հայաստանում մեքն ունեցել ենք ոստիիկանություն, մենք ունեցել ենք ԱԱԾ, ՊՆ՝ մարմիններ, որոնք համակարգել են և՛ օգնություն ստանալը, և՛ այն ուղղորդելը, և՛ բաշխելը: Կարծում եմ, որ ոչ միայն պարոն Գրիգորյանն է, որ պետք է պատասխան տա այս ամենի համար: Այդ նույն Արմավիրի մարզում կան իրավապահ մարմիններ, որոնք այդ օրերին կարող էին տեղյակ լինել: Շտապօգնության մեքենան ասեղ չի, որ տանես մի տեղ պահես, և պետք է նաև իմացող-թաքցնողները նույնպես պատասխանատվության ենթարկվեն»:

Ըստ պատգամավորի՝ ինչ վերաբերում է քաղաքական մասին, ապա Հանրապետական խմբակցությունը, քանի որ Մանվել Գրիգորյանը կուսակցության անդամ չէ, խմբակցության անդամ է, հետևաբար խմբակցությունը, ըստ Մարուքյանի, «պետք է քաղաքական դիրքորոշում արտահայտի և աջակցի իրավապահ մարմիններին, տվյալ պարագայում գլխավոր դատախազի հնարավոր միջնությունը խորհրդարան հարուցելու գործընթացին, որպեսզի օրենքով սահման կարգով ընթացքն ամբողջությամբ իրականացվի և որևէ խաթարող միջամտություն չլինի»: