Հանուն գրպանի. «Բագրատուր»-ն առաջարկում է հարստացնել Ադրբեջանի գլխավոր հովանավորի տնտեսությունը

Զբոսաշրջության զարգացումը Հայաստանի լրջագույն խնդիրներից է, մենք նաև մեր տուրիստական ընկերությունների միջոցով պետք է այնպես անենք, որպեսզի հնարավորինս շատ օտարերկրացու համար կարողանանք Հայաստանը գրավիչ դարձնել, մի պարզ պատճառով` տուրիստը պետք է գա Հայաստան ու փող ծախսի մեր երկրում:

Բայց... կա մի ցավագին բայց...: Հայաստանը շարունակում է գրավիչ երկիր չդառնալ զբոսաշրջիկների համար. մենք թվային առումով լուրջ հեռավորության մեջ ենք գտնվում հարևան Վրաստանի նկատմամբ, իսկ այս համատեքստում բավականին ցավալի է, երբ մեր տուրիստական ընկերությունները ոչ թե միտված են ազգանվեր գործով, այլ հակառակը` ազգադավ:

Կոնսերվատիվ չենք, բայց Հայաստանը դեռ պատրաստ չէ թշնամական Թուրքիայի հետ բացել օդային ճանապարհները և հայերին ուղղորդել դեպի Անթալիա հանգստանալու:

Ինչո՞ւ ենք անդրադառնում այս հարցին. բանն այն է, որ տուրիստական ընկերություններից մեկը` «Բագրատուրը», արդեն կոնկրետ գնային առաջարկներով, կոնկրետ հյուրանոցներով և որ ամենացավալին է` դեպի Անթալիա ուղիղ չվերթի խոստումով հայ ժողովորդին հորդորում է գնալ թշնամու երկրում հանգստանալու:

Երևի սեփականատերը չի հիշում, թե ինչ է եղել 1915 թվականին, ինչու մենք այսօր դիվանագիտական հարաբերություններ չունենք այդ պետության հետ, ով է մեզ համար մեկ այլ թշնամի երկրի` Ադրբեջանի հիմնական և գլխավոր հովանավորը:

Նա այս ամենը կիմանար, եթե պապն, օրինակ,1915 թվականին Արևմտյան Հայաստանից գաղթական դառնար, կամ տատը բռնաբարված կամ բռնության ենթարկված, իսկ որդին, օրինակ, ծառայեր Արցախում կամ սահմանամերձ Տավուշում:

Այդ ժամանակ գուցե «Բագրատուրի» սեփականատերը շահագրգռված չէր լինի իբրև էժան գներով հայերին տանել Անթալիայի՝ արևին պառկեցնելու թուրքերի վավաշոտ հայացքների ներքո և լցնելու Էրդողանի և Ալիևի` հայերի դեմ կիրառվող զենքի համար նախատեսված բյուջեն:

NEWSPRESS.am