Փաշինյանին մի խելացի մարդ պետք է գլխի գցի հեռու մնալ ստալինյան մեթոդներից

Կառավարության նիստերը սկսել են թեժ անցնել. ասվածի ապացույցը հունիսի 11-ի արտահերթ նիստն էր, որը շատ բուռն անցավ՝ շնորհիվ վարչապետ Նիկոլ Փաշինյանի և ՀՀ տնտեսական զարգացման և ներդրումների նախարար Արծվիկ Մինասյանի։

Արծվիկ Մինասյանը դեմ էր «Կուտակային կենսաթոշակների մասին» օրենքում լրացումներ կատարելու մասին» օրենքի նախագծին և իր «դեմ ըլլալը» հիմնավորեց իր սկզբունքայնությամբ, ինչին էլ հակադարձեց վարչապետ Նիկոլ Փաշինյանը՝ Արծվիկ Մինասյանին հիշեցնելով՝ «ով մեզ հետ չէ, մեզ դեմ է» հայտնի կարգախոսը։

Այսօր արդեն Նիկոլ Փաշինյանին շտապեց հակադարձել ՀՅԴ-ական մեկ այլ քաղաքական գործիչ` Արմեն Ռուստամյանն, ով Փաշինյանի՝ «մեզ հետ չէ, մեզ դեմ է» թեզը որակեց ստալինյան, իսկ իր ընկեր Արծվիկից կորզած պարտադրված ՝ «այո» քվերակությունը որակեց նախորդ Կառավարությանը բնորոշ գործելաոճի արդյունք։

Այն, որ Նիկոլ Փաշինյանի կառավարությունը սկսել է նախորդի ուղիով գնալ, արդեն ակնհայտ է՝ դրա մասին է փաստում ողջ պետական ապարատը ԵԼՔ-ականներով լցնելու քաղաքականությունը, տված խոստումներն ու հնչեցրած քննադատությունները մոռանալու արատավոր սովորությունը և քննադատություն չհանդուրժելը։

Համաժողովրդական աջակությունը վայելող մեր վարչապետ Նիկոլ Փաշինյանին սրտացավ մեկը պետք է գլխի գցի, որ եթե չի ուզում Սերժ Սարգսյանի հետ կատարվածի կրկնությունը տեսնել, պետք է ընդունի, որ ՀՀԿ-ի ուղին բռնելը վտանգավոր է, քանի որ չի բացառվում, որ իր ժամանակավոր կառավարության վերջն էլ չտեսնի և գահընկեց արվի նույն հասարակության կողմից, ով նրան ու իր անփորձ թիմին հասցրեց «Օլիմպոսի գագաթը»։

Եթե ցանկանում է այնտեղ երկար մնալ՝ պետք է սթափվի և հանդուրժի տեղին հնչեցված ցանկացած քննադատություն, ընդունի, որ այո՛, նախկինում ասել է մի բան, հիմա անում է բոլորովին հակառակը, և դա պետք չէ ներկայացնել որպես ժողովրդի շահերից բխող պարտադրված քայլ, այլ իրերը պետք է կոչել իրենց անուններով և պարզ ասել ժողովրդին, որ այս պահին ավելի լավ լուծում չեն կարողանում առաջարկել, դրա համար էլ, ստիպված, շարունակում են ՀՀԿ-ի կիսատ թողածը։

 NEWSPRESS.am