Մորը բռնաբարած 36-ամյա տղամարդը 7 տարվա ազատազրկման է դատապարտվել

Երեւանի բնակիչ 36-ամյա Արթուր Մ.-ն, որը  մեղադրվում էր մորը բռնաբարելու մեջ, նոյեմբերի 6-ին մեղավոր է ճանաչվել՝ դատապարտվելով 7 տարվա ազատազրկման: Դատարանը, ուսումնասիրելով, գործում առկա նյութերը, ապացուցված է համարել Արթուր Մ.-ի կողմից իր մոր նկատմամբ բռնի սեռական գործողություններ կատարելու դիտավորությունը: Այս մասին տեղեկացրին Մալաթիա-Սեբաստիա վարչական շրջանների ընդհանուր իրավասության դատարանից, որտեղ քննվում էր գործը:

Արթուր Մ.-ն դատարանում ընդունել է իր մեղքը՝ ասելով, որ զղջում է կատարվածի համար:

Նախաքննական մարմնի կողմից նշանակված դատահոգեբանական փորձաքննության եզրակացության համաձայն՝ Արթուր Մ.-ն մեղսունակ է ճանաչվել, նա հոգեկան խանգարումներ չունի, նրա մոտ միայն հայտնաբերվել է «Անձի եւ վարքի խանգարում ալկոհոլի գործածման հետեւանքով» ախտանիշը:

Ըստ մեղադրական եզրակացության՝ Արթուր Մ.-ն հուլիսի 19-ին, օգտվելով մոր հետ միայնակ լինելու հանգամանքից, վերջինիս հետ կատարել է սեքսուալ բնույթի գործողություններ, այնուհետեւ մոր կամքին հակառակ նրա հետ ունեցել է սեռական հարաբերություն:

Նշենք, որ Արթուր Մ.-ին մեղադրանք էր առաջադրվել Քրեական օրենսգրքի 138-րդ եւ 139-րդ հոդվածների 1-ին մասերով: Խափանման միջոց էր ընտրվել կալանավորումը: