Երջանկությունից ուշքի չի գալիս

Սփյուռքի նորանշանակ նախարար Մխիթար Հայրապետյանն, ով արդեն նախարարության ներսում հասցրել է հունից հանել իրենց գործի գիտակ, սփյուռքի նախարարության ուղն ու ծուծին տեղյակ մի շարք աշխատակիցների, սեփական PR բաղադրիչն ավելացնելու և ինքնակրթությամբ զբաղվելու իր անհագ ցանկությունն ի ցույց դնելու համար հետևյալ գրառումն է արել․

«Ահա այսպիսի երկխոսություն ունեցանք այսօր վարչապետ Նիկոլ Փաշինյանի հետ, երբ քննարկում էինք իմ առաջին հնարավոր այցի թեման:

Վարչապետ -Իսկ դու նաև արաբերե՞ն գիտես:

Ես -Չէ:

Վարչապետ -Վատ է, շատ վատ է:

Ես -Հիմա ի՞նչ, հրաժարակա՞ն տամ:

Վարչապետ -Չէ, ուղղակի արաբերեն էլ սովորիր:

Հ.Գ. Օ՜ֆ, օ՜ֆ, երբ ինչ-որ հրաշքով գա այն օրը՝ գրաֆիկս մի քիչ թեթևանա, պիտի սկսեմ նաև արաբերեն սովորել, ինչպես ասում են՝ վարչապետն է ասել»:

Վարչապետի՝ «նաև արաբերե՞ն գիտես» հարցը համայն հայության համար ֆեյսբուքյան էջում գրելով, այս երիտասարդը փորձել է հասկացնել, որ հայերենից բացի տիրապետում է նաև այլ լեզուների՝ մոռանալով, որ լեզուներին տիրապետելուց զատ, բազմաթիվ այլ հմտություններ են պետք Սփյուռքի նախարարության նման լուրջ կառույց ղեկավարելու համար, որպեսզի կարողանա գործ անել։

Իսկ գործ՝ նա դեռ չի արել: Փոխարենը՝ Հայրապետյանն իր նախորդի որոշ ծրագրեր է կասեցրել, և քանի որ վստահ է, որ հնարավոր է՝ տեղն ավելի կրեատիվ ծրագիր չառաջարկի, որոշել է դրանք ժամանակավոր կասեցնել։

Խոսքը վերաբերում է «Արի տուն», «Իմ Հայաստան» և «Ամառային դպրոց» ծրագրերին, որոնց կասեցման ժամանակը երբ ավարտվի, հավանաբար, նախարարը դարձյալ գործի կգցի իր ֆեյսբուքյան էջը և մի իմաստուն գրառմամբ կորոշի դրանք շարունակել։

Իսկ քանի դեռ Հայրապետյանը վայելում է բախտի նվերը, հասարակությունը սպասում է: Սպասում է հայրենադարձության կազմակերպման, հայկական համայնքներում տիրող խնդիրների բարձրաձայնման, սփյուռքի ներուժի արդյունավետ օգտագործման, որոնց լուծման ուղղությամբ դեռ որևէ գործուն սխեմա այս տղան չի առաջարկել։

Հեղափոխության էյֆորիան անցնում է և պետք է շտապել գործել, թե չէ՝ բախտի բերմամբ, թե պատահմամբ նախարար դարձած Հայրապետյանն, ով իրեն բաժին հասած երջանկությունից դեռ ուշքի չի գալիս, կարող է տապալվել, իսկ որ ամենավատն է՝ քայլ կարող է անել ու նրան տապալել նույն այն ժողովուրդը, որը նրան վեր է բարձրացրել։

Հ.Գ. Հոդվածն արդեն պատրաստ էր հրապարակման, երբ նախարարը՝ դարձյալ մոդայիկ դարձած ֆեյսբուքյան ուղիղ եթերով հայտարարեց, որ «Արի տուն» եւ «Սփյուռք ամառային դպրոց» ծրագրերը մեկտեղվելու են:

NEWSPRESS.am