«Լույսը հասավ Արցախի մայրաքաղաք Ստեփանակերտ»․ Պարգև արքեպիսկոպոս Մարտիրոսյան (լուսանկարներ)

Չնայած նրան, որ Արցախի մայրաքաղաք Ստեփանակերտում գործող Երիտասարդության ու մշակույթի պալատի առաջին հարկում քաղաքացիներ էին, որոնք իրենց բողոքներն էին գրում դիմում-նամակով, այնուամենայնիվ, պալատի երկրորդ հարկում տեղի ունեցավ Սուրբ Ղազար կղզում Մխիթարյան միաբանության հաստատման 300-ամյակին նվիրված միջոցառումների բացման արարողությունը: 

NEWSPRESS.am-ի թղթակցի փոխանցմամբ՝ արարողությանը ներկա էին բարձրաստիճան պաշտոնյաներ Արցախից, Հայ Առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը, ինչպես նաև Վենետիկի Մխիթարյան միաբանության վանահայրերը։

Միջոցառումները կտևեն 3 օր, որոնց ընթացքում երիտասարդական պալատում կցուցադրվի Մխիթարյան միաբանության պատմությունը, ինչպես նաև կցուցադրվեն բացառիկ գրքեր, որոնք տպագրել է միաբանությունը։

Միջոցառման ժամանակ ելույթ ունեցավ Պարգև արքեպիսկոպոս Մարտիրոսյանը, ով նշեց, որ Մխիթարյան միաբանության լույսը հասավ Արցախի մայրաքաղաք Ստեփանակերտ։ Նա ընդգծեց նաև, որ թե՛ Նապոլեոնը, և թե՛ Ադոլֆ Հիտլերը չկարողացան ձեռք տալ Մխիթարյան հայրերին ու իրենց հիմնած միաբանությանը։

Արքեպիսկոպոսը բարձր գնահատեց նրանց կատարած աշխատանքն ու ընդգծեց, որ արցախցիները նույնպես իրենց նյութական ներդրումն ունեն միաբանությանը տրված բարերարության գործում։