ՀՀԿ-ում եղանակ է փոխվել. ատամները չեն էլ սրել

Օրերս մամուլն անդրադարձել էր նոր կառավարության ծրագրին, որն այսօր ներկայացվեց Ազգային ժողովին: Խոսակցություններ կային, որ ՀՀԿ-ն գնալու է ռևանշի և քարը քարին չի թողնելու, ուղղակի բզկտելու է ծրագիրը: Կար նաև տարբերակ, որ ՀՀԿ-ն չի անցկացնի ծրագիրը, խոսվում էր նաև, որ այն «քոփի-փեստ» կլինի և նոր կառավարությունը պարզապես կյուրացնի ՀՀԿ-ի ծրագիրը:

Նախ՝ նոր կառավարության ծրագիրն ընդհանուր դրույթներով առանձնապես չի տարբերվում նախորդ ծրագրից, անգամ բաժիններ կան, որտեղ լավագույն ցանկություններից և հեռահար ապագայից բացի, այլ եզրահանգումներ չկան:
Ինչ որ է, սպասվում էր, որ այս ծրագիրը Ազգային ժողովում բուռն քննարկման է արժանանալու և վախճանը հենց ԱԺ-ում անխուսափելի է, սակայն այսօր ԱԺ-ում լրագրողների հետ ճեպազրույցում ԱԺ փոխնախագահ Էդուարդ Շարմազանովը հայտնել է, որ ՀՀԿ-ն հնարավորություն է տալու, որ կառավարության ծրագիրն անցնի, իսկ թե ինչ է փոխվել այս օրերին` պարզ չէ:

Որ կառավարության ծրագիրը կատարելություն չէ, պարզ է ֆեյսբուքյան էջերում մասնագետների գրառումներից և փորձագետների կարծիքներից:

Մասնագետներից մեկը նշել էր, որ անվտանգության թեմայով աշխատանքն ունի մի քանի թերություններ: Առաջին հերթին՝ այն գիտահեն չի, 2-րդ՝ բաժանումը ներքինի և արտաքինի՝ արհեստական է, որովհետև պետության անվտանգությունը չի բաժանվում արտաքինի և ներքինի: Եվ հատկապես զարմանալի է, որ արտաքին քաղաքականությունը ներառել են անվտանգության մեջ, ինչը նույնպես արհեստական է:

Արտաքին քաղաքականությունն, իհարկե, կապ ունի անվտանգության հետ, բայց նաև ուղղակիորեն այն անվտանգության հայեցակարգի մեջ դիտարկելը ճիշտ չէ:
Սննդագետ Դավիթ Պիպոյանը գյուղատնտեսության վերաբերյալ նշել էր, որ ծրագիր ներկայացնողներն ավելի շատ ոչ թե ոլորտի խնդիրների վրա են կենտրոնացել, այլ՝ գեղեցիկ բառեր ներկայացրել. մասնավորապես՝ «հեղափոխական տեմպերով զարգացում», «դրամատիկ ջանք»:

«Գյուղատնտեսությունը Հայաստանում տեղից դրամա է, իսկ գյուղատնտեսության մեջ թափվող ջանքը, եթե մի օր մոտենան ու այս պայմաններում տեսնեն գյուղացու աշխատանքը՝ ծրագիր գրողները ձեռնպահ կմնան նմանատիպ բառեր գրելուց, առավել ևս՝ գյուղատնտեսության մեջ հեղափոխական արդյունքներ ակնկալելուց:

Հեղափոխությունը մեզ մոտ մեկ ամսում տեղի ունեցավ, իսկ 2800 լ կաթնատվությամբ կովերը ոչ թե մեկ ամսում, այլ մեկ տարում 5600 լ կաթնատվություն չեն ունենա: Մեր հողերի բերրիության խնդիրները մեկ-երկու ամսում չեն լուծվի»,-ասել էր նա:

Ի դեպ, ի թիվս բոլոր շարադրված դրույթների՝ արտահերթ ընտրությունների հարցը առաջին տեղում է: Ինչպես երևում է՝ ՀՀԿ-ն ևս դեմ չէ արտահերթ ընտրություններին, հակառակ դեպքում՝ այսօր իրոք «քարը քարին չէր թողնի»:

NEWSPRESS.am