Խմբակցության որոշ գործիչների դուրս գալը պայմանավորված է պետական ապարատի ռեպրեսիվ հնարավոր գործողություններով. Աշոտյան

Ազգային ժողովի Հանրապետական խմբակցությունն այլևս խորհրդարանական բացարձակ մեծամասնություն չէ։ Այս մասին լրագրողների հետ զրույցում ասաց խմբակցության պատգամավոր Արմեն Աշոտյանը։

Հիշեցնենք, որ ՀՀԿ-ական 6 պատգամավոր դուրս են եկել խմբակցությունից, և այսօր խմբակցությունն ունի 52 մանդատ:

«ՀՀԿ-ն արդեն մեծամասնություն չէ, սակայն շարունակում ենք մնալ խորհրդարանում ամենաշատ պատգամավոր ունեցող խմբակցությունը: Այսինքն՝ ձայների քանակով առաջին խմբակցությունն ենք, սակայն եթե մնացած պատգամավորները միասնական քվեարկությամբ են հանդես գալիս, ապա իրենք են դառնում որոշիչ մեծամասնություն»,- ասաց նա:

Աշոտյանը կարծիք հայտնեց, որ այս իրավիճակը պետք է դիտարկել քաղաքական բնական պրոցեսների փոփոխությունների համատեքստում, և խմբակցության որոշ գործիչների դուրս գալը պայմանավորված է նաև պետական ապարատի ոչ համաչափ և ռեպրեսիվ հնարավոր գործողություններով:

«Ակնհայտ է, որ այս գործընթացները գործադիր իշխանությունում եղած իշխանափոխության տրամաբանական շարունակությունն է, և խորհրդարանն ավելի շատ է համահունչ դառնում հասարակական-քաղաքական տրամադրություններին այն առումով, որ գումարային որոշիչ ձայներն այլևս ՀՀԿ-ին չեն պատկանում: Սա, իհարկե, ենթադրում է, որ ոչ ՀՀԿ-ական բոլոր պատգամավորները՝ անկախները և այլ խմբակցությունների ներկայացուցիչները, այդ դեպքում պետք է միասնական քվեարկեն և ներկա լինեն քվեարկություններին: Քանի որ շատ փոքր է տարբերությունը ձայների, և, անգամ եթե 1-2 պատգամավոր էլ լքի ՀՀԿ-ն, քվեարկության ժամանակ մոբիլիզացիայի խնդիր կա երկու կողմերից էլ»,- ասաց Արմեն Աշոտյանը: 

Նրա դիտարկմամբ, եթե նույնիսկ էլի պատգավորներ լքեն ՀՀԿ-ի շարքերը՝ միևնույնն է ՀՀԿ-ն պահպանելու է իր թիվ մեկ քաղաքական խմբակցության դերը՝ լինելով ամենամեծ խմբակցությունն այս խորհրդարանում։