Դատավորներն էլի առաջնորդվում են «շեֆին լսելու» սկզբունքով. ԱԱԾ նախկին պետը՝ Բաբայանին ազատ արձակելու մասին

«Սամվել Բաբայանին ու այն բոլոր տղաներին, ովքեր անիմաստ ու կեղծ մեղադրանքներով ազատազրկված են, անմիջապես պետք է ազատ արձակել»։ Այս համոզմունքին է ԱԱԾ նախկին պետ Գուրգեն Եղիազարյանը։

Նա NEWSPRESS.am-ի հետ զրույցում հիշեցնում է 1998 թվականը, երբ ազատ արձակվեցին ՀՅԴ-ականներ Վահան Հովհաննիսյանն և Արմեն Ռուստամյանը, քանի որ երկրում իրավիճակ էր փոխվել։

«Դատարանը, հաշվի առնելով այդ փոփոխությունը, նպատակահարմար գտավ խափանման միջոցը փոխել։ Այսինքն՝ նախադեպն արդեն կա, և դրա իրավունքն ամրագրված է, որը կիրառելով՝ կարող են թեկուզ հենց այսօր ազատ արձակել Սամվել Բաբայանին․․․ ինչի՞ չեն անում: Հունիսի 15-ին հաջորդ դատական նիստն է․ տեսնենք՝ ինչ են անելու»,- ասաց Գուրգեն Եղիազարյանը։

Թե ինչու Սամվել Բաբայանը մինչ օրս ազատ չի արձակվել, ԱԱԾ նախկին պետն իր բացատրությունն ունի։ Նրա խոսքով՝ տարիներ շարունակ դատաքննություններն ընթացել են «հեռախոսազանգային իրավունքով»՝ պատվեր են ստացել, թեև այսօր բոլորը դա ժխտում են։

«Բոլոր ստահակներին ասեմ՝ հիշո՞ւմ են նրանք, թե ինչպես մեզ հետ վարվեցին 2008 թվականին՝ նույն Սերժ Սարգսյանին զանգելով․ ինձ և իմ ընկերներին երկու ամիսը մեկ պետք է տանեին դատարան և դատաքննության ժամկետը երկարացնեին։ Իմ ձերբակալության ընթացքում 3 անգամ դատական նիստ է եղել և 3 անգամն էլ չեմ մասնակցել, քանի որ դատավորը պետք է աներ այն, ինչ հրամայել էին իրեն Բաղրամյան 26-ից: Զանգը կա՝ գործողություն կլինի, չկա՝ չի լինի»,- ասում է Գուրգեն Եղիազարյանն ու վստահեցնում, որ դատական համակարգն այսօր էլ չի փոխվել։ Ըստ նրա՝ միայն կախարդական փայտիկի միջոցով դատավորներին կարելի է վերափոխել և դարձնել օրենքի մարդ, սակայն գոնե ինքը հրաշքներին չի հավատում։

Գուրգեն Եղիազարյանը նկատում է, որ երկրում իրավիճակ փոխելու համար հարկավոր է ձերբազատվել այն ԱԺ-ից, որն այսօր ունենք։

«Երևի Հայաստանը միակ երկիրն է, որ ունի նման անհամապատասխանություն կառավարությունում և ԱԺ-ում․ ունենք վարչապետ, որին առաջադրել է ժողովուրդը և ունենք ԱԺ, որի մեծամասնությունը նախկին իշխանությունն է, որը քանդուքարափ արեց երկիրը ու լափեց մինչև վերջին աղյուսը։ Այս իրավիճակում ինչից էլ խոսենք, էլի գնալու ենք դեպի ԱԺ, որը ոչ մի բան անել չի ուզում»,- ասում է Գուրգեն Եղիազարյանը՝ հավելելով, որ մինչև ԱԺ-ն չցրվի և նոր խորհրդարան չունենանք, ոչինչ չի փոխվի, քանի որ հիմա խորհրդարանական երկիր ենք։ 

«Մեկը կար՝ իր համար, իր հագով հագուստ կարեց և որոշեց, որ պառլամենտական երկիր ենք, որպեսզի մնա, էլի վայելի իր համախոհների հետ․ չստացվեց, փլուզվեց և փառք Աստծո, քանի որ Հայաստան էինք կորցնելու, բայց քանի դեռ ԱԺ արտահերթ ընտրություններ չեն եղել, մենք կանգնելու ենք կոտրած տաշտակի առջև»,- ասաց Գուրգեն Եղիազարյանը։

Նա խոստացել էր՝ մինչև կառավարության 100 օրը չլրանա, չի խոսելու, սակայն չի կարող չասել, որ այսօր գտնվում ենք անհասկանալի մի վայրում, որտեղ չի կարելի սպասել թռիչքաձև հաջողությունների։

Դարձյալ անդրադառնալով Սամվել Բաբայանի ազատ արձակմանը՝ նա նշեց, որ այսօր դատավորները չեն փոխվել և առաջնորդվում են «շեֆին լսելու» սկզբունքով։

«Սամվել Բաբայանը ձերբակալվել է դատարկ խողովակի համար։ Մեկը չի ասում՝ լա՛վ, էս մարդուն էդ խողովակի համար ինչո՞ւ են բռնել։ Այսինքն՝ դա զենք չէր, զենքն այն է, որը կիրառվում է, իսկ դա զենք չի կոչվում։ Բացի այդ, Սամվել Բաբայանը կալանավայրում է ուղիղ թշնամանքի արդյունքում։ Առիթը գտան կալանավորելու․ խողովակը մեկի հետ ուղարկեցին և կալանավորեցին»,- նշեց Գուրգեն Եղիազարյանը։

Արձագանքելով այն մտահոգություններին, որ Սամվել Բաբայանի ազատ արձակվելը հեղափոխության ալիք կարող է բարձրացնել Արցախում, Գուրգեն Եղիազարյանը նկատեց, որ եթե կա դժգոհություն, ալիքը պետք է բարձրանա։ 

«Նախ պետք է դժգոհությունները վերացնել, բայց չի կարելի Արցախը վտանգել, քանի որ այնտեղ ամեն մի հավաք ուղիղ վտանգում է Արցախի պետականությանը, քանի որ թշնամին կարող է օգտագործել առիթը»,- եզրափակեց Եղիազարյանը։