Սասուն Միքայելյանը տեղյակ չէ, որ Նորատուսցի Ալիկը քաղբանտարկյալ չէ․ նոր իշխանության պատկերացումը՝ օրինական երկիր ստեղծելու մասին

Ազգային ժողովի «Ելք» խմբակցության պատգամավոր Սասուն Միքայելյանը գործի է դրել իր ջանքերը՝ քրեական հեղինակությանը բանտից ազատելու համար։

Նրա նախաձեռնությամբ ԱԺ մի շարք պատգամավորներ միջնորդել էին քրեական հեղինակություն հանդիսացող Նորատուսցի Ալիկի` Ալիկ Բանդուրյանի ազատ արձակմանը։

Պատգամավորները երաշխավորել էին Բանդուրյանի համար մոտավորապես այս համատեքստում․ թույլ տվեք դուրս գա՝ երաշխավորում ենք, որ իրեն խելոք կպահի։

Դատարանն, իհարկե, մերժեց այս միջնորդությունը, բայց եթե բավարարեր, ապա հարկ է նշել, որ միջնորդող պատգամավորներից յուրաքանչյուրը պետք է դեպոզիտ հաշվին վճարեր 500 հազար դրամ գումար:

Չենք քննարկում այն, որ այս անգամ էլ ևս գործի էր դրվել «մի ձեռքում մտրակ, մյուսում՝ կարկանդակ» սկզբունքը։ Այսինքն՝ մի կողմից, կարծես թե, նոր իշխանությունը փորձում է ձերբազատվել քրեական հեղինակությունների պատճառած «անհարմարություններից», մյուս կողմից՝ նպաստում է պատժից նրանց ազատելու գործին։

Այստեղ ավելի շատ խնդիրն այն է, թե ինչու է Սասուն Միքայելյանը շահագրգռված գործով և ինչու է Սասուն Միքայելյանը նման փութաջանությամբ ձեռնամուխ եղել Ալիկ Բանդուրյանի ազատման գործին և ինչո՞ւ են պատգամավորները պատրաստ գումարներ շռայլել քրեական աշխարհի ներկայացուցչի համար։

Երևի Սասուն Միքայելյանը տեղյակ չէ, որ Նորատուսցի Ալիկը քաղբանտարկյալ չէ․․․

Ամեն դեպքում, եթե սա է նոր իշխանության պատկերացումն օրինական և արդար երկիր ստեղծելու մասին, և եթե նոր իշխանությունը ևս՝ նախորդի նման, պետք է սատարի հանցագործներին, ապա ինչո՞վ է տարբերվում նա նախկին բռնապետերից։

Հիշեցնենք, որ ամբաստանյալ Ալիկ Բանդուրյանը մեղադրվում է 2016թ. նոյեմբերի 13-ին Պետրոս Իսրայելյանին այլ անձանց հետ համատեղ Մուշեղ Մուշեղյանի առողջությանը դիտավորությամբ ծանր վնաս պատճառել դրդելու մեջ: Այսինքն` հորդորելու, շահագրգռելու եղանակով Պետրոս Իսրայելյանի մոտ Մուշեղ Մուշեղյանի նկատմամբ հանցավոր ոտնձգություն կատարելու վճռականություն է հարուցել, ինչպես նաև նույն օրը հանցավոր խմբին օժանդակել է պլանավորված հանցագործության անխոչընդոտ իրականացմանը` Մուշեղ Մուշեղյանի առողջությանը ծանր վնաս պատճառելու գործընթացը հեշտացնելու, հետևաբար` խոչընդոտները վերացնելու եղանակով:

NEWSPRESS.am