35-ամյա տղամարդը իրենց բնակարանում բռնաբարել է հարազատ մորը

Երևանի ընդհանուր իրավասության դատարաններից մեկում ավարտվել է երիտասարդ տղամարդու՝ Ա. Մ.-ի գործի քննությունը, ով մեղավոր է ճանաչվել իրենց ընտանիքի կողմից վարձակալած բնակարանում հարազատ մոր նկատմամբ սեքսուալ բռնի գործողություններ կատարելու, ապա մորը բռնաբարելու համար: 2015 թվականի հուլիսի 27-ից Ա. Մ.-ն կալանքի տակ է: Ըստ դատական ակտի՝ դրանից մոտ մեկ ամիս առաջ՝ հունիսի 19-ին, ժամը 15-ի սահմաններում 35-ամյա Ա. Մ.-ն տուն է մտել ու տեսել է, որ մայրը խոհանոցում է: Համոզվելով, որ բնակարանում իրենից ու մորից բացի ոչ ոք չկա, Ա.-ն բանալիով փակել է մուտքի դուռը, այդպիսով՝ մորը նախապես գցել է անօգնական վիճակի մեջ, ու գնացել է խոհանոց: Լսելով դռան ձայնը՝ տանտիրուհին մտածել է, թե ամուսինը վերադարձավ աշխատանքից: Բայց շրջվել ու տեսել է՝ որդին է: Մայրը զարմացած հարցրել է՝ վայ, էս դո՞ւ ես: Որդին, ըստ դատական ակտի, ձեռքերը պարզել, շոյել է մոր այտերը ու ասել է՝ հա, ես եմ: Մորը որդու պահվածքն ու տոնը դուր չի եկել, նա զայրացել, ասել է՝ էս ի՞նչ ես անում, ու հրել է որդուն: Ապա մոտեցել է բնակարանի մուտքի դռանը, բայց տեսել է, որ դուռը փակ է: Կինը գոռացել է, օգնության է կանչել  հարևանուհուն:

Այդ պահին որդին նրան սպառնացել է, որ եթե աղմուկ բարձրացնի, ինքը կզանգի քրոջ ամուսնուն ու կասի, որ բռնաբարել է քրոջը: Մայրը, միգուցե ճանաչելով որդուն, իրոք վախեցել է, որ նա կզանգի ու նման բան կասի դստեր ամուսնուն: Մայրը սկսել է համոզել զավակին, որ սխալ քայլ չանի, ասել է՝ հերդ էսա գալու է: Բայց որդին մորը չի լսել, նրան գցել է հենց միջանցքի հատակին, փորձել է սեռական հարաբերություն ունենալ հետը: Մայրը դիմադրել է: Որդին կոտրել է նրա դիմադրությունը և, մորը ծնկի բերելով, սեքսուալ բռնի գործողություններ է կատարել նրա նկատմամբ: Ապա բռնություն գործադրելով՝ քաշել, մորը տարել է ննջասենյակ, գցել է մահճակալին ու սեռական հարաբերություն  է ունեցել հետը: Դրա ընթացքում տուն է եկել հայրը, ու որդին թույլ է տվել, որ մայրը դուրս գա ննջասենյակից… Ա. Մ.-ին մեղադրանք է առաջադրվել բռնի սեքսուալ գործողություններ կատարելու և բռնաբարության համար՝ ՀՀ քրեական օրենսգրքի 139 հոդվածի 1-ին և 138 հոդվածի 1-ին մասերով: Ընդհանուր իրավասության դատարանում ամբաստանյալն իրեն մեղավոր է ճանաչել, զղջման խոսքեր է ասել և միջնորդել է գործը քննել արագացված ընթացակարգով: Տուժողն ու մեղադրողը չեն առարկել: Ըստ դատահոգեբուժական փորձաքննության եզրակացության՝ Ա. Մ.-ի մոտ հայտնաբերվել է «Անձի և վարքի խանգարում՝ ալկոհոլի գործածման հետևանքով»: Ըստ եզրակացության՝ այդ խանգարումը փորձաքննվողի մոտ արտահայտված չէ այն աստիճանի, որ նրան զրկի՝ իր գործողությունները ղեկավարելու, դրանց համար հաշիվ տալու հնարավորությունից: Այդ խանգարումը Ա. Մ.-ի մոտ չի ուղեկցվում ակտիվ հոգեախտաբանական ախտանիշներով, մտավոր-հիշողական կոպիտ խախտումներով: Փորձաքննվող Ա. Մ.-ն իրավախախտումը կատարելիս չի գտնվել հոգեկան գործունեության որևէ ժամանակավոր հիվանդագին խանգարված վիճակում, որը նրան կարող էր զրկել իր գործողությունների իմաստը, վտանգավորությունը գիտակցելու, դրանք ղեկավարելու հնարավորությունից: Նա գտնվել է ալկոհոլային հարբածության վիճակում… Ա. Մ.-ն ճանաչվել է մեղսունակ… Նախկինում՝ 2002 թվականին,  Ա.  Մ.-ն դատապարտված է եղել Ռուսաստանում, 5 ու կես տարի պատիժ է կրել… Ընդհանուր իրավասության դատարանը Ա. Մ.-ին մեղավոր է ճանաչել մեղսագրված երկու արարքների՝ բռնի սեքսուալ գործողություններ և բռնաբարություն կատարելու համար, ու վերջին հաշվով նրան դատապարտել է 7 տարի ազատազրկման: