Ի՞նչ են ցանկանում ԵՊՀ-ում պայքարող երկու կողմերը․ Արամ Սիմոնյան VS ուսանողներ

ԵՊՀ-ում կրքերը թեժ էին «Թավշյա հեղափոխությունից» առաջ, իսկ հիմա առավել թեժացել են։ Ուսանողներն այլևս չեն ցանկանում ռեկտորի պաշտոնում տեսնել Արամ Սիմոնյանին։ Այդ ամենն ավելի թեժացավ մի քանի օր առաջ, երբ պարզ դարձավ, որ ԵՊՀ-ն ամեն տարի «Հայաստանի երիտասարդական հիմնադրամին» փոխանցել է 100 միլիոն դրամից ոչ պակաս գումար։ Իսկ փաստացի ԵՊՀ-ում չկա զուգարանի թուղթ, չկա դասախոսական «մարդավայել» աշխատավարձ, չկան երիտասարդ կադրերի համար աշխատատեղեր, չկա որակյալ կրթություն, իսկ փոխարենը կան միլիոնավոր դրամներ ինչ-որ հիմնադրամի համար։

Արդեն այսօր ուսանողները հանդիպեցին ռեկտորի հետ ու ներկայացրին բոլոր խնդիրները։ ԵՊՀ-ն այլևս սպառել է իրեն, ու զգալի նվազել է այս բուհի ռեյտինգը։ Դա են վկայում այդ բուհում սովորող ուսանողների բողոքները, վերջին շրջանում ի հայտ եկող աղմկահարույց բացահայտումներն ու այլ իրողություններ։ Ուսանողները ցանկանում են բարեկարգել, ավելի լավացնել ու զարգացնել իրենց բուհը։

Ուսանողները պայքարում են ԵՊՀ-ի ու ուսանողների համար, իսկ Արամ Սիմոնյանը չի կարող այլ բանի համար պայքարել, եթե ոչ պաշտոնի։ ԵՊՀ-ի ռեկտորը նույնպես պիտի մտածի բուհի ռեյտինգի, կրթության ու կոռուպցիոն դեպքերը կանխելու ուղղությամբ, սակայն այսօրվա քննարկումը ցույց տվեց, որ նա ուղղակի չի տիրապետում իրավիճակին, կամ էլ լավ հասկանում է, թե ինչ է կատարվում, ուղղակի չի ցանկանում ցույց տալ, թե իբր հասկանում է։

Ուսանողները հստակ ու փաստերով ներկայացնում են խնդիրների մասին, անիմաստ ու աննպատակ ծախսվող միլիոնավոր դրամների մասին, ԵՊՀ-ում տեղի ունեցող քաղաքական ճնշումների ու այլ իրողությունների մասին։

Ուսանողները լավ հասկանում են, որ իբր գումար չունեցող բուհը տարեցտարի բարձրացնում է վարձավճարները, սակայն արդյունքում այդ գումարներն ուղղվում են ոչ թե դասախոսների աշխատավարձերի բարձրացմանը, ուսման որակի լավացմանը, այլ ինչ-որ հիմնադրամին ու այլ անհայտ ու աննպատակ ծախսերին։

Ուսանողները ցանկանում են, որ ԵՊՀ-ն չլինի ՀՀԿ-ին սատարող ու օգնող կառույց, չլինի ՀՀԿ-ի անդամներին գումար տրամադրող ու իր բյուջեն աննպատակ ծախսող (իհարկե, ծախսել բառը հարաբերական է, քանի որ այնտեղ կա կոռուպցիա), դասախոսին գրոշներ բաշխելով ու ուսանողին «բանի տեղ չդնող» կառույց։ Նրանք ցանկանում են, որ Մայր բուհը ծառայի ուսանողին, բարձրացնի կրթության որակը, երիտասարդ ու լավ կադրերը կարողանան աշխատել իրենց բուհում և չլինի կոռուպցիա, իսկ Արամ Սիմոնյանն այլ բան չի ցանկանում, եթե ոչ միայն մնալ պաշտոնում ու շարունակել ԵՊՀ-ում ուսանողների դեմ իրականացնել իր «բարի շղարշի տակ թաքնված տեռորը»։

NEWSPRESS.am