Տնտեսագետը՝ ԱԱԾ բացահայտումների մասին

Այն, ինչ այսօր անում է Ազգային անվտանգության ծառայությունը «350-ի ցուցակի» և ընդհանրապես հակակոռուպցիոն պայքարի համատեքստում, կարող է հետաքրքիր քաղաքական ու տնտեսական հետևանքներ ունենալ: Այս մասին ֆեյսբուքյան իր էջում գրել է տնտեսագետ Ատոմ Մարգարյանն՝ անդրադառնալով ապօրինի հարստացած անձանց մասին բացահայտումներին:

«Կոռուպցիոն սխեմաները անշուշտ ծրագրվել ու ղեկավարվել են ամենավերին մակարդակով: Սա կարելի է ասել տասնամյակների ընթացքում ձևավորված ու արմատակալած կառավարաոճ է եղել ու խոշոր բիզնեսի մարդիկ, թերևս առանց բացառության, ներգրավված են եղել այդ սխեմաների մեջ՝ պարտավորված լինելով մենաշնորհների, արտոնությունների ու քվոտաների դիմաց պարբերաբար մուծվել զանազան «հիմնադրամների» ու ստվերային հաշվեհամարների: Անվանենք դա «կոռուպցիոն տուրք»: Ու հիմա, երբ շերտ առ շերտ բացահայտվում են այդ սխեմաները, բիզնեսի մարդիկ, ազատագրվելով «կոռուպցիոն տուրքից» իրենց հերթին պարտադրված են դադարեցնել քաղաքական ծառայությունների մատուցումը այն քաղաքական ուժին, որի երբեմի հաճախորդն էին: Խոսքը հատկապես վերաբերում է Ազգային ժողովի ՀՀԿ խմբակցության գործարար պատգամավորն երին:

Ստեղծված իրավիճակում նրանց կողմից ողջամիտ քայլ կլինի լքել խմբակցությունը ու ձևավորել անկախ պատգամավորական խումբ:

Սա բիզնեսը քաղաքականությունից ինքնակամ տարանջատելու առաջին ողջամիտ քայլը կլինի: Իսկ հաջորդ քաղաքական ցիկլի ընթացքում ցանկացած գործարար կարող է մասնակցել քաղաքականությանը միայն միջնորդավորված՝ լոբբիստների միջոցով, ինչպես ընդունված է ողջ քաղաքակիրթ աշխարհում:

Ինչ վերաբերում է հակակոռուպցիոն արշավի տնտեսական հետևանքներին, ապա բիզնեսի վրա դրված ու այն խեղճացնող «կոռուպցիոն տուրքի» վերացումը թույլ կտա հսկայական միջոցներ /առնվազն երկրի ՀՆԱ 10 տոկոսը/ տնտեսել ներդրումերի, նոր աշխատատեղերի ստեղծման ու զարգացման համար»,- գրել է Ատոմ Մարգարյանը: