«Արարատբանկ»-ն արձագանքել է NEWSPRESS.am-ի հրապարակմանը

Օրերս NEWSPRESS.am-ն անդրադարձել է «Արարատբանկ»-ում տեղի ունեցած խարդախության դեպքի, որի առնչությամբ գործն այս պահին քննվում է:

«Արարատբանկ»-ի լրատվական ծառայությունը, արձագանքելով հրապարակմանը, պարզաբանել է տեղի ունեցածը, որի տեքստը ներկայացնում ենք ամբողջությամբ.

«Պարզաբանում

NEWSPRESS.am կայքում մայիսի 25-ին տպագրված «Ֆլեշի Բարսեղին» պատկանող «Արարատբանկ»-ը  խաբում է հաճախորդներին» վերնագրով նյութում ընդգրկված այն տեղեկատվության վերաբերյալ, թե`

«մոտ 3 ամիս առաջ քաղաքացի Զ. Աղաջանյանը «Արարատբանկ»-ի  Ավանի մասնաճյուղի կառավարիչի ներկայությամբ վճարել էիր վարկային պարտավորությունները՝ 17  հազար ԱՄՆ դոլար: Վճարման դիմաց Աղաջանյանին տվել են անդորրագիր և իր տան սեփականության վկայականը: Մի քանի օր անց նրան զանգահարել են արդեն «Արարատբանկ»-ի կենտրոնական մասնաճյուղից և ասել, որ քաղաքացու վարկային պարտավորությունները կատարված չեն...».

տեղեկացնում ենք, որ հոդվածում նշված դեպքը տեղի է ունեցել 2017թ.-ի սեպտեմբեր ամսին և բանկի ղեկավարությունը տեղեկանալուն պես դիմել է ոստիկանություն: Խնդրո առարկա վարկը տրամադրված է եղել «Արարատբանկ»-ի միացած «Զարգացման հայկական բանկ»-ի կողմից, իսկ հանցագործություն կատարած աշխատակիցը, որը ոչ թե կառավարիչ է, այլ կառավարչի տեղակալ, ևս հանդիսացել է «Արարատբանկ»-ի իրավանախորդ «Զարգացման հայկական բանկ»-ի աշխատակից, այնուհետև բանկերի միացման արդյունքում դարձել է «Արարատբանկ»-ի աշխատող:

Ավելին՝ տեղեկություններ կան, որ վարկառուն և կառավարչի տեղակալը եղել են ընկերական հարաբերությունների մեջ: Նշված դեպքով հարուցված է քրեական գործ և իրավապահների կողմից իրականացվում է քննություն:

Նշենք նաև, որ էպիզոդներից մեկով տուժող է հանդիսանում նաև «Արարատբանկ»-ը: Իսկ բանկի բաժնետիրոջ վերաբերյալ հոդվածագրի դատողությունները, այն է՝ «…«վենդետայից» իրեն ապահովագրելով՝ ցանկացել է գումարներ հանել երկրից» հարկ չենք համարում մեկնաբանել, քանի որ դրանք որևէ տրամաբանության չեն ենթարկվում ու ուղղակի անհեթեթ են:

«Արարատբանկ»-ի լրատվական ծառայություն»: