Միգուցե ԲՀԿ-ի ժամանակը...

Որքան էլ անսպասելի էր, ՀՀԿ-ի համար իրողությունները 2018-ի ապրիլ-մայիս ամիսներին փոխվեցին. Ինչքա՜ն հույսեր կային և ինչքան ծրագրեր, որ այդպես էլ մնացին իշխանական թղթերին: Այժմ եկել է ընդդիմադիր ՀՀԿ-ի ժամանակը:

Արդեն Ազգային ժողովում ՀՀԿ-ի ձայնն այդպես չի լսվում, ՀՀԿ-ականները գերադասում են աչքի չընկնել, ինչպես օրինակ Գագիկ Ծառուկյանի «շնորհազրկման» ժամանակ, երբ ՀՀԿ-ականներից ոմանք որոշել էին, որ Ծառուկյանի առյուծների սրտից էին համտեսել. այժմ իրենց ավելի հավաք են պահում` գրեթե ընդդիմադիր:

Թեև դեռևս ՀՀԿ-ն խորհրդարանում գերակշռություն ունի, սակայն այսօր արդեն խոսվում է աշնանը նոր խորհրդարանական ընտրություններ անցկացնելու հավանականության մասին:

Իհարկե, դժվար է կանխատեսել, թե որ քաղաքական ուժն ինչքան ձայն կհավաքի, սակայն, որ ՀՀԿ-ն նախկին թափն ու ռեսուրսները չունի, հաստատ է:

Չի բացառվում, սակայն, որ մինչև աշուն փոփոխություններ կլինեն նաև նոր կառավարության քաղաքականության նկատմամբ:

Կառավարությունը նոր է, սակայն արդեն այստեղից-այնտեղից դժգոհություններ, բողոքներ կան: Այնպես որ՝ դժվար է խոսել աշնանը խորհրդանական ընտրությունների արդյունքների վերաբերյալ:

Հաստատ է այն, որ որոշակի էլեկտորատ ունի «Ծառուկյան դաշինքը», և դա շնորհիվ Գագիկ Ծառուկյան անհատի. եթե նա չկանգնի այս կուսակցության գլխին, ապա ընտրություններն այս անգամ ևս անորոշ կլինեն:

Սակայն, եթե Գագիկ Ծառուկյանը մնալով կուսակցության ղեկավար` աշնանը գնա ընտրությունների, դժվար կլինի կանխատեսումներ անել:

Մի որոշակի զանգվածի համար Ծառուկյանը հեղինակություն ունի` թեկուզ նրանով, որ եկեղեցիներ է կառուցում, օգնում է Կոտայքի մարզին, տարբեր ծրագրեր կան մարզի երիտասարդության համար, մայիսի 9-ին օգնություն է տրամադրում վետերաններին, անվճար ուսանողական ավտոբուսներ են գործում և այլն:

Այստեղ հարցը շատ կամ քիչ անելը չէ, այլ այն, որ Ծառուկյանը գումար ունի և օգնում է, իսկ կան մարդիկ, ովքեր գումար ունեն, սակայն միայն իրենց ծառն են ջրում և, օրինակ, Արտաշատից երբեք որևէ ավտոբուս ուսանողների համար անվճար չի աշխատել, այնպես որ՝ Հովիկ Աբրահամյանն էլ աղքատ չէ, սակայն որևէ նպաստ չի բերել մարզի տարրական կարիքներին, իսկ Ծառուկյանի պարագայում` խոսելու տեղ ունի:

Վերադառնանք ընտրություններին: Այս ամենից հետևում է, որ ընտրությունները կլինեն անկանխատեսելի` ինչպես ընդդիմությունների, այնպես էլ իշխանությունների համար: Ժողովրդի սերը հարաբերական է. մարդիկ սպասում էին, որ այսօր աշխատավարձեր են բարձրանալու, լավ են ապրելու, սակայն ապրում են այնպես, ինչպես մեկ ամիս առաջ:

ԲՀԿ-ն և «Ելք»-ը մտածում են ընտրությունների մասին, իսկ ՀՀԿ-ն` ոչ, սակայն, ինչպես ասում են շաբաթն ուրբաթից շուտ կգա: Ոչ մի վստահություն չկա, թե որ կուսակցությունը կհաղթի. Ժողովրդի սերն այնքան հարաբերական է, եթե փող չկա, ընտրությունները որ ուղղությամբ ասես կարող են հոսել...

NEWSPRESS.am