Newspress.am-ի հրապարակումից հետո Մանվել Գրիգորյանը փորձել է փրկվել խայտառակությունից

NEWSPRESS.am-ը երեկ հրապարակումով էր հանդես եկել, որ Բաղրամյան 26-ի դիմաց Վեդիի բնակիչ Սասուն Գևորգյանը հանդիպում էր ակնկալում վարչապետ Նիկոլ Փաշինյանի հետ:

Բանն այն է, որ մայիսի 23-ին, 69 տարեկանում, «Աստղիկ» ԲԿ-ում մահացել է քաղաքացու մայրը՝ Սեդա Գևորգյանը, ով 20 տարի շարունակ ապրել է Դաշքեստանում (Արա լեռ) գտնվող` ԵԿՄ նախագահ Մանվել Գրիգորյանի տանը, պահպանել այն, դրանից բացի, ինչպես Արցախյան, այնպես էլ Քառօրյա պատերազմի ժամանակ դիրքերում եղել է նրա կողքին, սակայն Սեդայի որդին փաստի առաջ էր կանգնել և հիասթափվել ու նեղսրտել՝ Գեներել Մանվելը չէր ուզում աջակցել իրեն:

Մեր հրապարակումից հետո ԵԿՄ նախագահ Մանվել Գրիգորյանի մոտ, հավանաբար, ամոթի զգացում է արթնացել կամ մարդկայնության նշույլներ են իրենց զգալ տվել: Նյութից հետո, ԵԿՄ վարչություն է հրավիրել Սասուն Գևորգյանին ու խոստացել մոր հուղարկավորության համար անհրաժեշտ ծախսերը հոգալ:

Խնդիրն այստեղ այլևս այն չէ, թե Գեներալ Մանվելը կտա՞ բավարար գումար իր ողջ կյանքն իրեն նվիրած կնոջ հուղարկավորության համար, թե՝ ոչ: Այստեղ արդեն ընդգծվում է մարդու անպաշտպան և միայնակ լինելու հարցը մեր երկրում: Այնքան չեն զարգացել ենթակառուցվածքները, որ մորը կորցրած մարդն իր սուգը թողած մնա ոչ այնքան բարեհաճ ինչ-որ գեներալների հույսին կամ ակնկալի, որ Բաղրամյան 26-ի մուտքերի մոտ կարող է վարչապետին բռնացնել և իր ցավը պատմել:

Հիշեցնենք նաև, որ որոշ վճարումներով պայմանավորված՝ հիվանդանոցը հրաժարվել էր հանձնել դին։ Քաղաքացին օգնության խնդրանքով դիմել էր ԵԿՄ, սակայն նրան ընդամենը 100.000 դրամ են տվել, որն անգամ հիվանդանոցի ծախսերի համար չէր բավականացնի։ Վիրավորված տղամարդը դուրս էր եկել շենքից՝ չվերցնելով այդ գումարը։