Արագաչափերի գործունեությունը դադարեցնելու հետևանքով զոհերի թիվն ավելացել է․ Օսիպյան (տեսանյութ)

Վարչապետ Նիկոլ Փաշինյանի հայտարարությունից հետո, ըստ որի պետք է դադարեցվեին արագաչափերի և տեսախցիկների գործունեությունը, ավելացել են վթարների և զոհերի թվերը։

Այս մասին այսօր՝ մայիսի 24-ին, կառավարության նիստի ժամանակ ասաց ՀՀ ոստիկանապետ Վալերի Օսիպյանը:

Փաշինյանը նկատեց, որ կառավարությունում պետք է որոշումներ կայացվեն ո՛չ թե քաղաքացիների դեմ, այլ ի շահ նրանց, ուստի այս որոշումը պետք է վերանայվի։ Բացի այդ, ոստիկանապետն ընդգծեց նաև, որ տուգանքների համաներման հետ կապված որոշումը որոշ վարորդների շրջանում դժգոհությունների առիթ են դարձել։

«Տարբեր կարծիքներ կան համացանցում, հիմա պետք է մենք փորձենք բացատրել եղելությունը ու մեր կայացրած այս որոշման հետևանքները։ Բարեխիղճ քաղաքացիները, որոնք վճարել են ՃՈ տուգանքները, ասում են՝ վերադարձրեք մեր գումարները»,-ասաց Օսիպյանը:

Փաշինյանը նկատեց, որ այս հարցը ևս պետք է քննարկվի և հավասարակշռված որոշում կայացվի։

«Ենթադրվում է, որ կան լուծումներ, այո՛, բարեխիղճ քաղաքացիները վճարել են, շատ-շատերը չեն վճարել, որովհետև մեծ հավանականությամբ չեն ունեցել, հիմա պարոն Միրզոյանն էլ է ասում՝ վճարել է, ես էլ եմ վճարել, դո՞ւք էլ եք վճարել, պարոն Օսիպյան, իսկ պարոն Զեյնալյանը նախկինում չի վճարել, բայց որոշել է քաղաքական իրավիճակի փոփոխություններից հետո վճարել»,- ասաց Նիկոլ Փաշինյանը։

Նկատենք նաև, նախատեսված է ներել մինչեւ 2017-ի դեկտեմբերի 31-ը և վերջին իրադարձությունների օրերին գրանցված խախտումները։

Մանրամասները՝ տեսանյութում