Հեղափոխականները Շարմազին «սիրում» են

Երգչուհի Արմինկան խոսել է որդու հոր մասին, նաև անդրադարձել է սոցիալական ցանցերում տարածվող լուրերին, թե Էդուարդ Շարմազանովն է նրա երեխայի հայրը:

«Հեղափոխությունից» հետո, փորձ է արվում ամեն ինչ և բոլորին ժխտել և անվանարկել, որի միջոցով նաև որոշակի միավորներ հավաքել քաղաքական դաշտում` մարդկանց ամբողջովին սևացնելով:

Ի դեպ, ժամանակին Սերժ Սարգսյանն ասում էր՝ գաղջ մթնոլորտը լրագրողներն են ստեղծում, իսկ այժմ ի՞նչ կասի կեղծ պրոֆիլների «պրոֆեսիոնալ» գաղջության մասին:
Արմինկան հերքել է, որ իր երեխայի հայրը Շարմազանովն է, և ինքն իրավունք ունի ապրելու իր կյանքով, ունենալ սեփական անկողինը, ինչպես բոլորը:

Ստեղծվել է նողկալի վիճակ, որտեղ բոլոր միջոցներն օգտագործվում են «Ելք» դաշինքի անդամներից, «հեղափոխականներից» բացի, բոլորին մեղադրելու մարդկային բոլոր մահացու մեղքերի մեջ: Մեծամասամբ դա արվում է կեղծ պրոֆիլների միջոցով:
Սա արդեն բնական հակազդեցություն է առաջացնում. անգամ ՀՀԿ-ական կեղծ պրոֆիլներն այսքան կատարյալ թույներ չէին օգտագործում:

Հետաքրքիր է, թե Արմինկայի մեղքը ո՞րն է, որ սոցիալական ցանցերում որոշել էին նրա երեխայի հոր ինքնությունը:

Եվ առաջին անգամը չէ, որ «պաշտպանենք մեր երեխաներին» անվան տակ ծանր հարված են հասցնում հենց երեխաներին. այդքա՞ն են սիրում երեխաներին, թե՞ նպատակներին հասնելու համար կեղծ պրոֆիլների միջոցով որոշել են բոլոր հարցերը լուծել այս միջոցով:

Ակնհայտ է, որ ներկա կառավարությունը ոտքերի տակ դեռ ամուր հող չունի, իսկ դրա փոխարեն բազմաթիվ կեղծ պրոֆիլներ կան, ակնհայտ «հեղափոխական», որոնք ատելություն են տարածում, երբեմն ոչ հայերենով, որից երևում է, որ մարդիկ պարզապես հայերենին չեն տիրապետում: Չի բացառվում, որ անգամ հենց երեխաներ լինեն կեղծ պրոֆիլների հեղինակները, երբեմն այնքան անմիտ մտքեր են շարադրվում և լատինատառ:

Չմոռանանք, որ երգչուհի Շուշան Պետրոսյանի որդիներին ևս ոչ ընդունելի արտահայտություններով էին որակել, իսկ Շարմազանովի հանդեպ կեղծ «հեղափոխական» պրոֆիլներն իսկական սեր են տածում: Նրա դստեր նամակից հետո սոցիալական ցանցերում իսկական ատելության բում է. մրցակցում էին՝ ով ավելի ճղճիմ ու անմիտ արտահայտություններ կանի: Սա ևս զարմանալի է:

Նման իրավիճակը հավակնություն ունի բացասական ու անառողջ մթնոլորտ ստեղծել, որը սոցիալական ցանցերից տեղափոխվել է իրական կյանք: Գուցե նոր կառավարությունը կարողանա գազի և էլէներգիայի գները նվազեցնել, կարգավորել տրանսպորտի հարցերը, սակայն բարոյահոգեբանական խնդիրների լուծման համար դեղատոմս գրել չեն կարող` հակազդող դեղամիջոց դեռևս չկա:

NEWSPRESS.am