Էջմիածնում Գրիգորյանների «բեսպրիդելն» ու «բդեշխությունը» սահման չի ճանաչում. գեներալի նոր «արկածները»

Էջմիածնում շարունակում է տիրել Գրիգորյանների «բդեշխությունը»:

NEWSPRESS.am-ի տեղեկություններով, վերջերս գեներալ Մանվել Գրիգորյանի «շքախումբն» անցնելիս է եղել իր «տիրության» փողոցներից մեկով, երբ հանկարծ գեներալը նկատել է մի գարեջրատուն: Նա կանգնեցնել է տվել մեքենան և գարեջրատան տիրոջը «կարգադրել» պոկել գովազդային ցուցանակը, քանի որ այն իրեն դուր չի գալիս:

Թեև այս պատմության մեջ չի բացառվում նաև, որ պարզապես գարեջրատունը բացվել է առանց Գրիգորյանների իմացության, և սա բարկացրել է «տիրոջը»:

Մեկ այլ տեղեկության համաձայն էլ` Էջմիածնի «Number one» սուպերմարկետի բակում կայանված «անցանկալի» մեքենաները բախվում են մանվելականների «դուբինկաներին»: Եթե որևէ մեկը խանութ մտնելուց առաջ մեքենան թողնում է բակում, ապա դուրս գալով՝ իր մեքենայի կայանած վայրում կարող է տեսնել միայն երկաթե կույտ:

Մի խոսքով, «բեսպրիդելը» Էջմիածնում չի նահանջում: Իսկ էջմիածինցիներն էլ ինչպես վերոհիշյալ, այնպես էլ շատ նման դեպքերի մասին խոսում են շշուկով՝ մանվելականների ականջից հեռու, որպեսզի զերծ մնան նրանց հաշվեհարդարից:

Ու եթե Մանվել Գրիգորյանն այսօր հրաժարվում է, ինչպես Արմեն Աշոտյանը կասեր՝ իրեն «ծնած, սնած ու աճեցրած» Հանրապետական կուսակցությունից՝ Երկրապահում իր դիրքերը չկորցնելու համար, ապա հարկ է նկատել, որ իր հաստատած բռնապետությամբ այստեղ ևս երկար չի կարող «ձգել». բումերանգի նման մի օր հարվածը նրա ճակատին կխփի: