«Վահանաձև գեղձի կովկասյան դպրոց». աննախադեպ ուսուցողական ծրագիր՝ Երևանում

Վահանաձև գեղձի խնդիրների ախտորոշման ու արդյունավետ բուժման հարցում միջազգային մակարդակով առաջատար մասնագետներն ու բժշկական հաստատությունները պարբերաբար առաջարկում են նոր մոտեցումներ:

Հաշվի առնելով, որ Հայաստանում շատ մեծ է վահանաձև գեղձի խնդիրներ ունեցող մարդկանց քանակը, շատ կարևոր է քայլել միջազգային պրակտիկային համընթաց ու փորձի փոխանակում իրականացնել:

Հենց այս նպատակով գլխի և պարանոցի շրջանի վիրաբույժ, ուռուցքաբան Արամ Բադալյանը և էնդոկրին վիրաբույժ Արմեն Վարժապետյանը նախաձեռնել են «Վահանաձև գեղձի կովկասյան դպրոց» ծրագիրը, որը տեղի կունենա հունիսի 11-13-ը՝ Երևանում: «Հայաստանի հակաքաղցկեղային լիգայի» և «Գլխի և պարանոցի ուռուցքների մասնագետների ռուսական միության» համագործակցության շրջանակում իրականացվող ուսուցողական ծրագիրն աննախադեպ է իր ֆորմատով և մասշտաբով:

Լեկցիաներ, պրակտիկ աշխատանքներ ու վիրահատություններ. հարուստ օրակարգով ծրագրի իրականացման մեջ ներգրաված են վահանաձև գեղձի խնդիրներով զբաղվող՝ Իտալիայի, Գերմանիայի ու Ռուսաստանի առաջատար մասնագետները: Միջոցառումը նախատեսված է վահանագեղձի խնդրի ախտորոշմամբ ու բուժմամբ զբաղվող տարբեր նեղ մասնագետների համար՝ էնդոկրինոլոգներ, ուռուցքաբաններ, վիրաբույժներ, ճառագայթաբաններ, ախտաբաններ:

ՀՀ, ՌԴ, Վրաստանի տարբեր բուժհաստատություններից շուրջ 200 մասնագետներ ներկա կլինի միջոցառմանը:

Միջոցառման մասնակիցները հնարավորություն կունենան ծանոթանալու այս պաթոլոգիայի ախտորոշման ու բուժման նոր և ակտուալ մեթոդներին, կստանան վիճելի հարցերի պատասխանները:

Վիրահատությունների ժամանակ ուղիղ կապ կհաստատվի էքսպերտների հետ, իսկ որոշ մասնագետներ անձամբ մասնակից կդառնան նախատեսվող վիրահատություններին:

Նախապես գրանցվելը պարտադիր է http://onco.am/ru/caucasian-thyroid-school կայքում:

Միջոցառումը տեղի կունենա «Էլիտ պլազա» բիզնես կենտրոնում: