Երևանում կան տարածքներ, որոնց բարեկարգումն ավելի առաջնային էր, բայց Փաշինյանը կասեր՝ «ամեն բան արված է, թողեք կառուցեն» (ֆոտո)

Բնապահպանները Մյասնիկյանի արձանի հարակից այգում տեղի ունեցող ծառահատումների մասին ահազանգ են ստացել դեռ փետրվարից։ Այն ժամանակ էլ արդեն պարզ է դարձել, որ նախաձեռնությունը պատկանում է «Վարդանյան ընտանիք» հիմնադրամին։ Եղբայրները նախատեսում են բարեկարգել տարածքն ու ներկայացրել են բավականին գեղեցիկ ու տպավորիչ նախագիծ։

Իհարկե, եթե ամեն ինչ արվի ըստ նախագծվածի, ապա այսօր քաղաքապետարանի դիմաց ակցիա կազմակերպողներն ու «Ավելի բարեկարգ Երևան» մակագրությամբ պաստառներ պատռողներն արդյունքից հազիվ թե նույն ակտիվությամբ դժգոհեն։

Սակայն այս պահին հարցն ամենևին դա չէ։

Մայրաքաղաքում շատ կան տարածքներ, որոնք լուրջ ներդրումների ու բարեկարգման կարիք ունեն, և կարելի էր այս նախագիծն իրականացնել հենց այդ վայրերում։ Իսկ Մյասնիկյանի և Շահումյանի արձաններին հարող տարածքները, թերևս այս առումով բարեկարգման խիստ անհրաժեշտություն չունեին, քանի որ կային և՛ գեղեցիկ ծառեր ու թփեր, և՛ ցայտաղբյուրներ ու շատրվաններ, և՛ փոքրիկ լողավազան։ 

Ինչպես նշված է նախագծում՝ կտրվել են իբրև թե միայն չոր ու ծերացած ծառերը, սակայն հարկ է նկատել, որ դրան զուգահեռ ո՛չ միայն հատվել են նաև գեղեցիկ ծառեր, այլև քանդվել է տարածքը, որի անհրաժեշտությունը չկար։ Ու հարց է առաջանում, թե արժե՞ր հատել առողջ ծառերը՝ այլ ծառեր տնկելու համար, երբ մեկ այլ տարածքում բարեկարգումն ու ծառատունկն ավելի առաջնային էր։

Իհարկե, այսօր արդեն, երբ ծառերը հատված են, և տարածքը քանդված է, մնում է միայն հուսալ, որ այն շատ արագ կվերականգնվի, բայց մյուս կողմից էլ, չենք կարող չնկատել, որ սա դարձյալ քաղաքապետարանի բացթողումն է։

Սրան, իհարկե, պետք է ուշադրություն դարձնի նաև ժողովրդի կողմից ընտրված վարչապետը, ով այս անգամ ակտիվիստների բողոքներին ի պատասխան՝ արձագանքեց, թե «ամեն բան արված է, թողեք կառուցեն»։ 

Սակայն, հատկապես այսօր, երբ փորձում ենք ստեղծել Նոր Հայաստան, վերադարձնել ժողովրդավարությունն ու ստեղծել օրենքի երկիր, շատ կարևոր է, որ թե՛ հասարակությունը, թե՛ նորաստեղծ իշխանությունը հասկանան, որ սա օրենքի խախտում է (փորձաքննության գործընթաց չի իրականացվել), որը չպետք է կրկնվի։

NEWSPRESS.am