Սահմանամերձ գյուղերի նախակրթարանների երեխաներին սննդով ապահովելը քննարկման ենթակա չէ

Բազմաթիվ սահմանամերձ գյուղեր դուրս են մնում նախակրթարանների երեխաներին սննդով ապահովող ծրագրից: Այս մասին ԱԺ-ում 2016թ-ի բյուջեի քննարկմանը հայտարարեց «Հայ ազգային կոնգրես» խմբակցության անդամ Նիկոլ Փաշինյանը:

Նա իր հարցադրումն ուղղեց ԱԺ Պաշտպանության, ազգային անվտանգության և ներքին գործերի հանձնաժողովի նախագահ Կորյուն Նահապետյանին.

«Ճիշտ չե՞ք համարում, որ առաջին հերթին պետք է ապահովվեին հենց սահմանամերձ համայնքի երեխաները, սակայն Հայաստանի ամենաառատ գյուղերն են ընկնում այս ծրագրի տակ, այսպես ուղղակի չի կարելի»:

Ի պատասխան Նիկոլ Փաշինյանի` Կորյուն Նահապետյանն ասաց. որ անվտանգության ամրապնդման տեսանկյունից սահմանամերձ համայնքների ամրապնդումը գերակա է իրենց համար և դրա ուղղած ցանկացած նախաձեռնություն ողջունելի է: Նա նշեց, որ կարող են համապատասխան քննարկման հարթակներում անդրադառնալ այդ հարցին:

Նիկոլ Փաշինյանին վրդովեցրեց այս պատասխանը, քանի որ ինքն այստեղ քննարկման ենթակա խնդիր չի տեսնում: «Մովսես գյուղի աշակերտին, որն ամեն օր թշնամու ուղիղ նշանառության տակ գնում է դասի, սննդի ծրագիր չենք անում, այստեղ քննարկելու բան չկա, այստեղ առաջնահերթությունների խնդիր կա»,-ասաց Փաշինյանը:

ԱԺ նախագահ Գալուստ Սահակյանն էլ նկատեց, որ Նիկոլ Փաշինյանի հարցադրումը շատ կոնկրետ է: «Ես կարծում եմ՝ խորհրդարանն աջակից կլինի Ձեր հարցադրմանը»,-ասաց նա: