Փաշինյանը փորձում է միանգամից չհիասթափեցնել ու չգցել իր վարկանիշը, բայց էյֆորիան տեղի է տալիս

Ավարտվեց «Սասնա Ծռերի» հերթական նիստը, և հերթական անգամ տղաներն ազատ չարձակվեցին։ Սա կարելի էր ակնկալել հատկապես վարչապետ Փաշինյանի հերթական  «լայվը» դիտելուց հետո։ Նա պարզաբանել է, թե չի կարող գնալ բանտախուցը բացել և ասել՝ «ժողովուրդ ջան, դուրս եկեք»․ ամեն ինչ օրենքի սահմանում պետք է լինի։ Փաշինյանը նաև պարզաբանել է, թե ինչ է նշանակում դա․

«Ուզում եմ ընդգծել, թե ինչն է օրենքով սահմանված կարգ՝ եթե, օրինակ, մարդու դատավճիռն ուժի մեջ է մտել, և նա դատապարտված է որոշակի ժամկետով ազատազրկման, մենք պետք է նայենք, թե արդյոք նրա պայմանական վաղաժամկետ ազատելու ժամանակը լրացել է և տեսնենք, թե ինչ օրինական ճանապարհներ կան, որ մենք էդ խնդիրն էդ ճանապարհով լուծենք։ Էլի եմ ասում՝ օրինական»։

Վարչապետը նաև նշել է, որ այս առումով «Սասնա Ծռերի» գործն այլ ուղղվածություն ունի և հավելել, որ կան գործեր, որտեղ մենք չունենք զոհեր, և կան գործեր, որտեղ մենք ունենք զոհեր։

Նա, իհարկե, չէր կարող միանգամից հիասթափեցնել իրեն հավատացող և վստահող մարդկանց և չէր կարող միանգամից ասել, որ քաղբանտարկյալ չկա։ Ուստի նախապատրաստում է իր «ընտրողներին», որ, օրինակ, կարելի է փոխել Անդրիասի ու Չուգասզյանի խափանման միջոցները, բայց ոչ երբեք Պավլիկ Մանուկյանինը։ Նա իր այս հայտարարությամբ գլխի է գցում, որ Շանթ Հարությունյանին կառաջարկվի պայմանական վաղաժամկետ ազատում, բայց ոչ գործի ամբողջական վերանայում․․․

Ի սկզբանե կարելի էր կանխատեսել, որ «քաղբանտարկյալների» հարցը լինելու է Նիկոլ Փաշինյանի վարկանիշն իջեցնող գործոնը։ Փաշինյանը նախապես գիտեր, որ եթե ինքն ազատեց «Սասնա Ծռերին», ապա բռնություն կիրառելու միջոցով խնդիր լուծելը կդառնա նախադեպ։

Այնպես որ՝ ոչ ոք չի արդարացվելու, իսկ լավագույն դեպքում կլինի պատժի կրճատում, կամ պայմանական վաղաժամկետ ազատում, բայց սա, ինչպես արդեն նշեցինք, հազիվ թե տարածվի «Սասնա Ծռերի» վրա, որոնց դեպքում զոհ է եղել։

Ինչևէ, «Սասնա Ծռերի» գործոնը թերևս կդառնա Նիկոլ Փաշինյանի առաջին տապալումը, իսկ երկրորդը, հավանաբար, կլինի վարորդների պահանջները չկատարելը։

Հիշեցնենք, որ վերջիններս պահանջում են զրոյացնել իրենց տուգանքները, ինչը հանրահավաքների ժամանակ խոստացել էր Փաշինյանը՝ վարչապետ ընտրվելու դեպքում։

Իսկ թե ինչ կլինի հետո, երբ բոլորը վերջնականապես դուրս գան հեղափոխության էյֆորիայից ու հիշեն իրենց տված խոստումները, որոնք այդպես էլ չիրականացան, ավելի լավ է չերևակայել անգամ։

Իսկ առայժմ հարկ է պարզապես նկատել, որ ժողովրդի թեկնածու Փաշինյանը նույնիսկ դուրս չի գալիս հանդիպելու իրեն ընտրած ու վարչապետի աթոռին նստեցրած ցուցարարներին։

NEWSPRESS.am