Նիկոլ-շոու

Նիկոլ Փաշինյանի վարչապետությունն սկսվեց կադրային նորամուծություններով, երիտասարդական կազմը հուշում է, որ կադրերի պակաս կար «Ելք»-ում և ով հայտնվել էր «ձեռքի տակ»՝ նրան էլ նշանակել են նախարար կամ փոխնախարար․ այս փաստը ոչ ոք չի էլ հերքում։

Առաջին քայլերից ակնհայտ է, որ նախարարները «սեփական» ափսեում չեն, փորձում են խաղալ բոլոր հնարավոր լարերի վրա՝ ՀՀԿ-ից տարբերվելու համար։ Ցուցանում են տնից աշխատավայր անցումը՝ որպես հասարակ մահկանացու։ Հանրությանն են ներկայացնում նախարարության ծակուծուկերը՝ փորձելով նվաստացնել նախկին նախարարին, մեկ ուրիշն աշխատել է տուրիստական գործակալությունում, որտեղից նրան պարզապես հեռացրել են ոչ կազմակերպչական «առավելությունների» համար։ Մյուսը, մինչև Նիկոլի վարչապետությունն, արդեն պաշտոններ էր բաժանում, անհարգալից խոսում կոլեգաների հետ։ Մյուս նախարարը, պարզվում է, երկրի վերաբերյալ անվայելուչ արտահայտություններ է իրեն թույլ տվել Ֆեյսբուքում, որից հետո ներողություն է խնդրում՝ անիմաստ։

Այս անիմաստությունները սթափ մարդկանց մոտ բնական հարց են առաջ քաշում՝ ձեզ տեսածի նման պահեք, որն, իհարկե, դժվար է։ Չէ՞ որ նրանք հայտնվել են պաշտոնական աթոռներին, հատկապես որ դեռ մի քանի օր առաջ ցուցարար էին կամ խռովարար, սակայն ոչ պաշտոնյա։ Ինչպես մի օգտատեր էր գրել՝ մինչև մեծանան, կծերանանք։

Ու այս ամենը լայվերի, ուղիղ եթերների ֆոնին։

Ընդունեք, որ անլուրջ է, փորձում են տարբերվել, սակայն այս ամենից պարզամտության, ոչ պրոֆեսիոնալիզմի հոտ է գալիս։ Բացի այդ, իշխանափոխության կողմնակիցները զինված են կեղծ պրոֆիլների բանակով, ովքեր ոչ միայն անպատկառ արտահայտություններ են իրենց թույլ տալիս սոցիալական ցանցերում, նաև իրենց կարծիքն են պարտադրում՝ քերթել, արտաքսել, նետել խորխորատը, անվանարկել, քշել երկրից և այլն։ Բացի այդ, հաճախ է պատահում, որ այդ նույն կեղծ պրոֆիլները բառիս իսկական իմաստով, հայհոյում են կանանց, հայհոյում են այլ կարծիք ունեցողներին․ այս ամենից 1937 թվայանի հոտն է գալիս։

Կարող են խելացի մարդու հեռացումը մեկնաբանել, թե մենք դրսից մարդ կբերենք, Նիկոլի՝ ատամ քչփորելն ինտելեկտի նշան, իսկ զուգարան-բաղնիք ցուցադրելը՝ ժողովրդավարություն համարել։

Կեղծ պրոֆիլները եղանակ են ստեղծում սոցիալական ցանցերում, որևէ այլ կարծիք դիտվում է հհկապաշտություն, թեև մինչև երեկ-առաջին օրը, նրանցից շատ-շատերը փորձում էին ՀՀԿ-ից ժպիտ կորզել։ Ի դեպ, մեկ նկատառում, ՀՀԿ ֆեյքերը բավականին քչացել են, չի բացառվում, որ, եղանակի փոփոխությամբ պայմանավորված, անցել են Նիկոլի կողմ՝ ով փող տվեց։

Այսօր թաքնվել են դիմակների տակ՝ փորձում են երկրի օճառ-լվացքափոշիների որակը՝ որակյալ են։

Ինչպես ժամանակին ասել էր մի խելոք մարդ՝ ինչքան շատ ես բարձրանում, անկումն այնքան ցավոտ է լինում...

NEWSPRESS.am