Եթե եկող կիրակի ԱԺ արտահերթ ընտրություն անցկացվի «Ելք»-ը կհաղթի, բայց ժամանակի հետ այդ «շանսը» կնվազի

«Թավշյա հեղափոխության թվային արտացոլանք» հետազոտության տվյալներով քաղաքացիների նախընտրած խմբակցություններից առաջին տեղում «Ելք» դաշինքն է, երկրորդ տեղը զբաղեցնում է «Ծառուկյան» դաշինքը, իսկ երրորդ տեղում, որքան էլ տարօրինակ հնչի՝ Հանրապետական խմբակցությունը և միայն չորրորդ տեղում՝ ցածր տոկոսային հարաբերակցությամբ, Դաշնակցությունն է:

Այս մասին լրագրողների հետ զրույցում հայտնել է «GALLUP International association»-ի Հայաստանում լիիրավ անդամ ԷՄ ՓԻ ՋԻ ՍՊԸ տնօրեն Արամ Նավասարդյանը: Նրա գնահատմամբ՝ եթե առաջիկա կիրակի անցկացվեն արտահերթ խորհրդարանական ընտրություններ՝ հարցվածների 75.0 տոկոսն իր ձայնը կտար «Ելք» դաշինքին:

Իսկ այս պահի դրությամբ գոնե հարցվողների զգալի մասն այն համոզմունքին է, թե դրական տեղաշարժ կլինի 1 տարուց ավելի կարճ ժամանակամիջոցում: 

Թեև շարժման հենց սկզբից նախաձեռնող Նիկոլ Փաշինյանը վստահեցնում էր, թե շարժումը զուտ հայկական բնույթ է կրում, և արտերկրյա միջամտություններ չկան, այնուամենայնիվ, նրա խոսքերը քաղաքացիների մոտ այնքան էլ վստահություն չեն ներշնչել: Հարցվողներն, իհարկե, դժվարացել են ստույգ պատասխանել, թե որտեղից է գալիս աջակցությունը, բայց նաև եղել են կասկածներ, որ դա կլինի կա՛մ ԱՄՆ-ի, կա՛մ Ռուսաստանի և կա՛մ էլ ԵՄ-ի նախաձեռնությունը:

Նկատենք, որ հարցումներն անց են կացվել Հայաստանի բոլոր մարզերում և Երևանում մայիսի 4- 9-ն ընկած ժամանակահատվածում:

Սակայն քաղաքական որոշ վերլուծաբանների գնահատմամբ՝ չի բացառվում, որ ժամանակի հետ կփոխվի նաև «Թավշյա հեղափոխության թվային արտացոլանքը»: Նրանց գնահատմամբ՝ երբ հեղափոխության տպավորությունների ազդեցությունը թուլանա, հնարավոր է, որ խորհրդարանական առաջիկա ընտրություններում «Ելք» խմբակցության մեծ քանակությամբ ձայներ հավաքելու շանսերը նվազեն: