«Որ պահից չի լինի հանրային աջակցություն՝ կդադարեմ լինել վարչապետ». Փաշինյան

Վարչապետ Նիկոլ Փաշինյանը չի կարող ասել, թե կառավարությունում կա՞ն մարդիկ, ովքեր կշարունակեն պաշտոնավարել, քանի որ, նրա խոսքով, այս պահին կառավարությունում կառուցվածքային փոփոխություն չեն նախատեսում:

Ինչ վերաբերում է Սփյուռքի նախարարությանը, ապա այն կգործի առանց Հրանուշ Հակոբյանի:

«Սփյուռքի հետ հարաբերությունները շատ կարևոր են, և մենք պետք է ամեն ինչ անենք, որ այդ նախարարությունը գործի ոչ միայն Սփյուռքի և հայապահպանության շրջանակներում, այլ դա պետք է հայրենադարձությունը կազմակերպող և հայրենադարձությանն աջակցող հիմնական օղակը լինի»,-ասաց Փաշինյանը լրագրողների հետ զրույցում:

Փաշինյանն անդրադարձավ Լևոն Տեր-Պետրոսյանի հայտարարությանը: Նա ասել էր, թե «վտանգավոր այս իրավիճակից միակ ելքը արտահերթ խորհրդարանական ընտրություններն են, քանի որ եթե մինչ այս պահը Փաշինյանն իր կամքը խորհրդարանին պարտադրել է համաժողովրդական բողոքի ու ընդվզման միջոցով, խորհրդարանի վրա նույն մեթոդով ազդեցություն չի ունենա»:

«Որ պահից չի լինի հանրային աջակցություն, այդ պահից սկսած ես կդադարեմ լինել ՀՀ վարչապետ»,- ասաց նա:

Իսկ թե ինչ ժամկետում կլինեն արտահերթ խորհրդարանական ընտրությունները հարցին, Փաշինյանը պատասխանեց, որ քննարկումների ընթացքում կորոշեն: «Ամենասեղմ, բայց տրամաբանական ժամկետում»,-ասաց նա: