Վարդանյան եղբայրները մաքրագործվե՞լ են

Հայաստանի քաղաքական վերջին փոփոխություններով պայմանավորված՝ երկու պատգամավոր ̀ Գրիգոր Ավալյանը և Արմեն Բաբայանը վայր դրեցին իրենց մանդատները:

Այս պատգամավորներն ամուր թելերով կապված էին «Գրանդ Հոլդինգ» ընկերության ղեկավարներ Միքայել և Կարեն Վարդանյանների հետ և, այսպես ասած, նրանց դրածոներն էին Ազգային ժողովում:

Նրանք իրենց պատգամավորության շրջանում ամբիոնից տառ ասած չկան, հանդես չեն եկել ոչ մի օրենսդրական նախաձեռնությամբ, կարճ ասած՝ ունեին զրո քաղաքական հեղինակություն և որպես պատգամավոր՝ չեղածի հաշիվ էին:

Նմանատիպ պատգամավորներ մենք Ազգային ժողովում դեռ շատ ունենք, բայց հրաժարականների ֆոնին բավականին պաթետիկ հայտարարություն տարածեցին Վարդանյան եղբայրները, ովքեր նրանց մանդատները վայր դնելը բավականին «թանկ են ծախում» ժողովրդի վրա: Նրանք այդկերպ ցանկանում են ապահովել իրենց ժողովրդական աջակցությունը և ստեղծել ֆոն, թե Վարդանյան եղբայրները կանգնած են ժողովրդի կողքին, կամ դեմ են անօրինականություններին, օլիգարխիային:

Այս համատեքստում, եկեք ուշադրություն դարձնենք, թե ինչպես են նրանք սկսել իրենց հայտարարությունը. «Սիրելի՛ հայրենակիցներ, «Գրանդ Հոլդինգ»-ի կողմից Ազգային Ժողովում ներկայացված անկուսակցական պատգամավորներ Գրիգոր Ավալյանը և Արմեն Բաբայանն այլևս չեն լինելու պատգամավոր»:

Սահմանադրությունն ու Ընտրական օրենսգիրքը զրոյի հավասարեցնող այս նախադասությունը տարածվեց և այդպես էլ չփոխվեց: Չեն փոխվի նաև Վարդանյան եղբայրները, ովքեր, փաստորեն, ընդունում են, որ իբրև թե չլինելով քաղաքականության մեջ կամ որևէ կուսակցության չպատկանելով, սեփական գործակալներին են ներդրել Ազգային ժողովում և ցանկացած պահի կարող են ստիպել պատգամավորներին՝ վայր դնել մանդատները: Արդյո՞ք դա քաղաքական հետաքրքրություններ չունեցող մարդկանց վարքագիծ է, բնականաբար̀՝ ոչ:

Պետք է միայն փաստել, որ դժվար է հավատալ Վարդանյան եղբայրներին, ովքեր նախկինում պատրաստ էին իրենց հոլդինգի աշխատողին տանել Ազգային ժողով, որպեսզի որոշակի ազդեցություն ունենան, իսկ այսօր իբրև թե փոխվել են և սրբացել:
Հոգուն բեռ չանելով էլ, կարող ենք նկատել, որ բարդ է ասելը՝ մաքրագործվե՞լ են արդյոք նրանք, թե՞ սա էլ որոշակի քաղաքական նյուանս է, որը դեռս չենք հասկանում:

NEWSPRESS.am