Միշտ գտնվելու է մարդ, ով ավելի շատ մարդ կկարողանա փողոց դուրս բերել․ դա ամեն ինչ է, բայց ոչ ժողովրդավարություն

Երբ ունենք խորհրդարանական մեծամասնությունը, դրա հետ մեկտեղ փոքրամասնություն ներկայացնող վարչապետ, որը վտանգներով լի է։

Այսօր ասուլիսի ժամանակ ասաց Պաշտպանության նախարարի ժամանակավոր պաշտոնակատար Վիգեն Սարգսյանը՝ անդրադառնալով ներքաղաքական զարգացումներին։ 

«Այն, ինչ մենք ունենք հիմա, իրավական առումով անհասկանալի մոդել է․․․ Ի՞նչ է նշանակում այդպիսի կարգավորում, նշանակում է, որ ամեն անգամ, երբ մեծամասնության որոշումը ձեռնտու չլինի վարչապետին ու փոքրամասնությանը, նրանք պետք է մարդիկ դուրս բերեն փողոց և ճնշում գործադրեն պատգամավորների վրա՝ իրենց կամքին դեմ քվեարկելո՞ւ: Դա ամեն ինչ է, բացի ժողովրդավարություն լինելուց»,- նշեց Վիգեն Սարգսյանը:

Նրա գնահատմամբ՝ իրականում դա վտանգներով լի ձև է, քանի որ միշտ գտնվելու է մարդ, ով ավելի շատ մարդ կկարողանա փողոց դուրս բերել՝ այլ իրավիճակներում և այլ ժամանակներում:

«Կարող է մի քիչ էքստրեմալ հնչի, բայց ավելի նախընտրելի է այդ դեպքում ազնիվ ասել, որ խորհրդարանը չի ներկայացնում ոչինչ, հռչակվել դիկտատոր և որոշումներ կայացնել հրապարակում, հարցնել ժողովրդին, թե ինչպես կքվեարկի այս կամ այն հարցում, ոնց կքվեարկի ժողովուրդը, այդպես օրենքներ ու հրամանագրեր ընդունել, մինչև կձևավորվի նոր խորհդրարան: Նման փորձ աշխարհում շատ է եղել և աշխատել է: Իրավական շղարշով փակել այն, ինչը իրավական հիմնավորում չունի, շատ բարդ է»,- հավելեց նա:

Վիգեն Սարգսյանը նկատեց, որ իրենց թիմը եղել է իշխանություն և պարտավոր էին քայլեր անել, որոնք թույլ չէին տա նման զարգացում:

«Բոլոր դեպքերում սրված վիճակներում խրոնիկ հիվանդություն չեն բուժում: Հիմա սրված վիճակ է, միջամտություն է եղել վիրաբուժական, պետք է սպասել, որ վիճակը հանդարտվի, կայունանա, որից հետո պետք է սկսել բուժել խրոնիկ հիվանդություններն ու պատճառները, որոնք ծնել են այս իրավիճակը»,- ասաց նա: