Իսկ մշակութային մենաշնո՞րհը

Բացի տնտեսության, կապի, տրանսպորտի, ներկրումների ոլորտներից, որքան էլ զարմանալի է, մենաշնորհվել էր նաև մշակույթի ոլորտը։ Հատկապես երգ-երաժշտության և օպերային արվեստի ասպարեզում, որտեղ, հիմնականում, ամեն ինչ շարժվում էր նախկին առաջին տիկնոջ հրահանգով և ցանկություններով։

Սովորաբար, մենաշնորհումը արտահայտվում է միայն նախընտրելի երգիչ-երգչուհիներին, գրողներին, նկարիչներին, երաժիշտներին ասպարեզ տալով և համապատասխան միջավայր ստեղծելով միմիայն նախընտրելիների համար։

Ինչպես է այժմ մշակութային ոլորտը շարժվելու․ ինքնակազմակերպվելո՞ւ է, թե՞ նոր հրահանգիչ է հարկավոր՝ տարիներ շարունակ ենթակա տարածքը կառավարելու։

Օրինակ, Երևանի Պետական Կոնսերվատորիայի նախկին ռեկտոր Արմեն Սմբատյանը, ով նաև Կոնսերվատորիայի կառավարման խորհրդի նախագահն է, ժամանակին ամեն ինչ արեց, որպեսզի Կոնսերվատորիայի ռեկտոր դառնա Շահեն Շահինյանը, իսկ Կոնսերվատորիայի երրորդ հարկը տրամադրվի որդու՝ Սերգեյ Սմբատյանի նվագախմբին։ Հայաստանում գործում են նաև այլ նվագախմբեր, սակայն նախապատվությունը տրվում է մեկ նվագախմբի։

Իհարկե, վատ բան չկա, որ երիտասարդական նվագախումբը գործում է Կոնսերվատորիայում, սակայն եթե միայն մեկին է տրվում նախապատվություն, արդեն խոսում է այս ոլորտը նաև Արմեն Սմբատյանի կողմից կառավարվելու մասին։

Բացի այդ, հենց Արմեն Սմբատյանի ջանքերով Սպենդիարյանի անվան Օպերայի և բալետի ազգային ակադեմիական թատրոնի գեղարվեստական ղեկավար նշանակվեց Կոնստանտին Օրբելյանը։ Նախ նա ազատվեց անցանկալի կադրերից և այստեղ ևս շարունակվում է նախընտրելի կազմի ելույթները։

Բացի այդ, ռուսախոս Կոնստանտին Օրբելյանն ազատվեց իր համար ոչ ցանկալի կադրերից, որոնց մի մասը մեկնեց երկրից՝ մնալով առանց աշխատանք։

Այս ամենն, իհարկե, կատարվում էր Ռիտա Սարգսյանի ընկերուհու՝ Հասմիկ Պողոսյանի ձեռամբ և, իհարկե, Արմեն Սմբատյանի անմիջական ջանքերով, իսկ Հասմիկ Պողոսյանից հետո Արմեն Ամիրյանը ևս վատ չէր կատարում նախկինի ավանդույթները։

Ի դեպ, Շահեն Շահինյանին երաժշտական աշխարհը չէր էլ ճանաչում, նրա անունը ավելի շատ հայտնի էր կրպակների հետ կապված պատմություններում։

Կարճ ասած, դեռևս անհայտ է, թե ինչ է լինելու մշակութային բազմաշերտ ոլորտում, կկարողանա՞ նոր մշակույթի նախարարը ոլորտում ցրել մենաշնորհումը, թե՞ դաշտում արդեն տարիներ շարունակ հաստատված կադրերը կշարունակեն ավանդույթները և մշակութային անցումը կլինի անցնցում։

NEWSPRESS.am