Ի պատասխան Լևոն Տեր-Պետրոսյանի հայտարարությունների

Հայաստանի Հանրապետական կուսակցությունը հայտարարություն է տարածել՝ պատասխանելով ՀՀ առաջին նախագահ Լևոն Տեր-Պետրոսյանի հայտարարությանը, թե պատգամավորներ Գրիգոր Ավալյանին և Աղվան Վարդանյանին ՀՀԿ կողմից ներկայացվող մանդատից հրաժարվելու պահանջը հակասահմանադրական է: Ներկայացնում ենք հայտարարությունն ամբողջությամբ:

«Ի պատասխան Լևոն Տեր-Պետրոսյանի հայտարարությունների՝  /http://www.ilur.am/news/view/67946.htmlhttp://www.ilur.am/news/view/68004.html/ Հայաստանի Հանրապետական կուսակցության խմբակցությունից հայտնում են, որ բացառությամբ Տավուշի մարզի ընտրատարածքային ցուցակով ընտրված անկուսակցական պատգամավոր Գրիգոր Ավալյանի, ՀՀԿ խմբակցության պատգամավորներից և ոչ ոք իր մանդատը վայր դնելու մասին հայտարարություն չի արել: Գրիգոր Ավալյանը, օգտվելով Սահմանադրությամբ և ԱԺ կանոնակարգ Սահմանադրական օրենքով իրեն տրված լիազորություններից և իրավունքներից, ինքնակամ, առանց որևէ պարտադրանքի կամ հարկադրանքի որոշում է կայացրել հրաժարվել մանդատից: Ինչ վերաբերում է ՀՀԿ խմբակցության մյուս պատգամավորներին, ապա նրանք վայր չեն դրել մանդատը և չեն էլ պատրաստվում:  Սահմանադրական իրենց իրավունքների համաձայն ազատ են և անկախ աշխատելու որպես պատգամավոր, քվեարկելու և որոշումներ կայացնելու՝ իրենց մտքին, խղճին և համոզմունքերին համապատասխան»:

Լևոն Տեր-Պետրոսյանի հայտարարության մեջ ասվում էր, թե «ՀՀ Սահմանադրության 94-րդ հոդվածում ամրագրված է. «Պատգամավորը ներկայացնում է ամբողջ ժողովրդին, կաշկանդված չէ հրամայական մանդատով, առաջնորդվում է իր խղճով և համոզմունքներով»։ Հետևաբար մանդատից հրաժարվելու՝ պատգամավորներին ներկայացվող պահանջը հակասահմանադրական է։