Եթե իմ կուսակցությունը պահանջի՝ պատրաստ եմ վայր դնել մանդատը, բայց նրա օգտին չեմ քվեարկի. Աղվան Վարդանյանը՝ վարչապետի ընտրության մասին

Վերջին երկու-երեք օրերին հետևել եմ վարչապետի թեկնածու Նիկոլ Փաշինյանի զուսպ, հավասարակշռված ելույթներին:

Այս մասին ԱԺ ամբիոնից հայտարարեց «ՀՅԴ» խմբակցության քարտուղար Աղվան Վարդանյանը:

«Արցախ, ՌԴ, ԱՄՆ, Իրան, Վրաստան... Ոչ մի տարբերություն, նույնը, ինչ ասում ու փորձում էր իշխանությունը: Ներքին կյանքի կարգավորման հարցում նվազագույն տարբերությունն այն էր, ինչ ծրագրում առաջնահերթ էր համարում կոալիցիան: Այո՛, տեմպերի խնդիր կար, ինչը մեզ էլ չէր գոհացնում, բայց դեռ հարց է, մեծ հարց՝ Փաշինյանի վարչապետության դեպքում տեմպերը մեզ բավարարելո՞ւ են»,- ասաց ՀՅԴ-ական պատգամավորը:

Նա արձանագրեց, որ Փաշինյանի առաջարկած ծրագրային քայլերը տարբեր չեն՝ էական բացառությամբ:

«Անշրջելի իրողություն է, Սերժ Սարգսյանը հրաժարական է տվել, մնում է ժողովրդի ցանկությունը: Ժողովրդի վստահությունը վայելող այլ գործիչներ էլ ենք տեսել՝ նաև տխուր վերջաբանով:

Անձամբ ես՝ բարձր եմ գնահատում Նիկոլի անձնազոհությունը, ես հավատում եմ նրա ձգտումների ազնվությանը: Բայց ես երբեք անձերով չեմ առաջնորդվել, կուռքեր չեմ ընդունում, վտանգի կանխազգացում ունեմ, չեմ կարող վստահ լինել, որ սա ավելի մեծ խաղի բարդ ու բազմաշերտ սցենարների համակցություն չէ»,- շեշտեց Աղվան Վարդանյանը:

Պատգամավորը նշեց, որ չի կարող բացառել, որ դա անդառնալի հետևանք չի ունենա ժողովրդի համար: Վարդանյանի խոսքով՝ ինքն էլ ոգևորված է շարժմամբ և ուզում է, որ կուտակված էներգիան կորուստների դուռ չբացի:

«Ես չեմ կարող անձնական պատասխանատվություն ստանձնել ու կողմ քվեարկել պարոն Փաշինյանի օգտին: Անկեղծ ասած, սա ընտրություն էլ չէ, ինձ երկու տարբերակ են թողել, քվեարկել կա՛մ Նիկոլին, կա՛մ Փաշինյանին: Ես չեմ քվեարկելու: Ես ՀՅԴ-ական եմ, որի խմբակցությունը կողմ քվեարկելու որոշում ունի: Եթե իմ կուսակցությունը պահանջի՝ պատրաստ եմ վայր դնել մանդատս»,- ասաց Աղվան Վարդանյանը:

Նյութի աղբյուրը՝ tert.am