Խորտակվող նավում մենակ, ընդդեմ Նիկոլի...

Այսօր Ազգային ժողովում հատուկ նիստ է. ընտրում են վարչապետ: Մինչ այդ պատգամավորները հարցեր են ուղղում վարչապետի միակ թեկնածու Նիկոլ Փաշինյանին:

Ի դեպ, ո՞րն է Նիկոլ Փաշինյանի և Սերժ Սարգսյանի նմանությունը. երկու դեպքում էլ դաշտում միայնակ են որպես թեկնածու` ինչպես Սերժ Սարգսյանը, այնպես էլ Նիկոլ Փաշինյանը:

Իսկ անակնկալն այն էր, որ պարզվում է ՀՀԿ բոլոր պատգամավորները տեղյակ են, թե ի՞նչ է կատարվում երկրում`աղքատություն, արտագաղթ, բանկային ծանր համակարգի լուծ, անհասանելի բուժծառայություններ և այլն:

Իսկ թե ինչո՞ւ նրանք այդ հարցերը չեն լուծել, պատգամավորները պատասխաններ չունեն, միայն հարցեր:

Հատկապես հարցերով աչքի ընկան ՀՀԿ տիկնայք, ովքեր, սովորաբար, խոհեմությունից ելնելով` մի մասը լռում էին, մյուսներն այդքան էլ խոհեմ չէին և չեն եղել: Պարզ է, որ որոշակի ռազմավարություն է գործում և հաճախ պատգամավորները չէին տիրապետում անգամ հարց մատուցելու արվեստին` մի մասը չի ծառայել, մի մասը ռուսախոս է, մի մասը անգիր է արել հարցերը. Իսկ ընդհանրապես, խոսքը Նիկոլ Փաշինյանին ծուղակելու մասին էր: 

Նորմալ է, երբ երկրի ղեկավարի պաշտոնին հավակնող թեկնածուին հարցեր պետք է տալ` հասկանալու համար նրա գաղափարները երկրի կառավարման, ապագայի վերաբերյալ, սակայն երբ հարցեր են ուղղում երկրի ճակատագրով երբևէ չմտահոգված պատգամավորները, ուղղակի զավեշտալի է:

Փաշինյանը և պատգամավորները խաղում են տարբեր լարերի վրա, սակայն նպատակը միայն գլխավոր լարն է, եթե Փաշինյանն անկեղծ էր իր ձգտումներում` վարչապետ դառնալու, ապա պատգամավորներ փորձում են համագործակցության, անվտանգության տակ սքողել կուսակցական, անձնական նկրտումները:

Ենթատեքստում չի բացառվում, որ Սերժ Սարգսյանին, որը դեռևս խաղի մեջ է, դուր գալը, կամ էլ իրար կիպ-կպած լինելը, ինչըը ևս կարող է հետագայում պաշտպանել ՀՀԿ-ն:

ԱԺ-ում ՀՀԿ պատգամվորների համար մեկ իրողություն է պարզ դարձել. ԲՀԿ-ն լքել է իրենց, Դաշնակցությունը` շուտափույթ հեռացել, ՀՀԿ-ն մնացել է խորտակվող նավում միայնակ, իսկ դիմացը Նիկոլն է:

NEWSPRESS.am