Ի՞նչ փոխվեց այս 6 ամսվա մեջ․ Փաշինյանի փաստարկները ՀՀԿ-ականների համար համոզիչ չեն

«Հանրապետական» խմբակցության պատգամավորները Նիկոլ Փաշինյանի հետ հանդիպման ժամանակ նկատեցին, որ նրա տեսակետը 180 աստիճանի տակ փոխվել է։ Պատգամավորները նրան հարցեր ուղղելիս մեջբերում էին հենց իր իսկ կողմից նախկինում հնչեցրած մտքերը և համեմատում դրանք նրա՝ այսօրվա կողմնորոշման հետ, որոնք ոչ մի կերպ չէին համընկնում։

Արմեն Աշոտյանը նկատեց, որ Փաշինյանն ասում էր, թե «ԵԱՏՄ կազմում ՀՀ-ի մնալու միակ հիմնավորումը շանտաժն է», «ԵԱՏՄ-ն բացի վնասից, ոչ մի օգուտ չի բերել Հայաստանին», ««Ելքն» իշխանություններին 10-2 հաղթեց փաստարկներով՝ ԵԱՏՄ-ից դուրս գալու առումով», «ԵԱՏՄ-ին անդամակցությունից հետո Հայաստանը տարածքներ է կորցրել»:

«Ի՞նչ փոխվեց այս 6 ամսվա ընթացքում, երբ ԵԱՏՄ անդամակցության գնահատականները չեն հնչում նախկինի պես: Երկրորդ` Դուք միայնակ չեք, և շարժումն ունի քաղաքական թիմ, և այդ թիմում շատ են արևմտյան հայացքներ ունեցող գործընկերներ, որոնք չնայած Ձեր հայտարարություններին՝ տարածում են հակառուսական մեսիջներ»,- հարցրեց Աշոտյանը Փաշինյանին:

Փաշինյանը նշեց, որ այսօր ունեն նոր քաղաքական իրողություն, և ցանկացած քաղաքական և պետական գործիչ պետք է հաշվի նստի նոր իրողությունների հետ:

«Ընդհանրապես, մեր շարժման հետ կապված, ռուսամետ, արևմտամետ, ամերիկամետ սխալ ձևակերպումներ կան, բայց շարժումը հայամետ է: Ձեր ցանկացած այդպիսի տպավորություն թյուր է, քանի որ սա մաքուր հայկական շարժում է։ Բոլոր գործընկերների հետ պետք է զարգացնել հարաբերությունները, բայց դա չպետք է անել մեկը մյուսի հաշվին»,- ասաց նա:

Արմեն Աշոտյանը Նիկոլ Փաշինյանի ասածներից ևս մեկ մեջբերում ներկայացրեց, որում նշել էր, թե ապրիլյան պատերազմն Ադրբեջանին ԵԱՏՄ մտցնելու մասին էր: «Ես կարծում եմ, որ երբ որ ՀՀ երրորդ նախագահ ընտրված վարչապետը հրաժարական էր տալիս և իր հայտնի հայտարարության մեջ ասաց` Նիկոլը ճիշտ էր, ես սխալվեցի, այս բոլոր հարցերի պատասխանը կարելի էր փակել, որ այս դեպքում Սերժը ճիշտ էր, Նիկոլը սխալվեց, և չասել, որ իրավիճակ է փոխվել»,- ասաց նա:

Նիկոլ Փաշինյանը նշեց, որ սա դեռ իր հրաժարականի տեքստը չէ:

Շարունակելով՝ Արմեն Աշոտյանն ասաց. «Ես ունեմ իմ կարծիքն այդ հայացքների կտրուկ շրջադարձերի մասին, այն քաղաքական համատեքստում եմ գնահատում, պարզապես փաստեմ՝ այս շրջադարձը մասնագիտացված առումով ինձ համար համոզիչ չէ»: