Փաշինյանը՝ Ռոբերտ Քոչարյանի հայտարարության մասին

Նիկոլ Փաշինյանը ժամանակ չի ունեցել լսել ՀՀ երկրորդ նախագահ Ռոբերտ Քոչարյանի հայտարարությունն այն մասին, թե իշխանությունը ճամպրուկ չէ, որ վերցնեն ու փոխանցեն։

Նա, լրագրողների հարցին ի պատասխան՝ նշեց, որ կծանոթանա հայտարարությանը, հետո կպատասխանի։

Հարցին, թե ստիպելո՞ւ եք ՀՀԿ-ականներին դեմ գնալ իրենց սկզբունքին, Փաշինյանը պատասխանեց․

«Դուք քաղաքական իրավիճակն ինքներդ եք տեսել, չեմ կարծում, թե նորից վերապատմելու անհրաժեշտություն կա»:

Հարցին, թե որքանո՞վ Փաշինյանին կհաջողվի պահել ժողովրդին 35 օր և առավելևս 2 ամիս՝ մինչև արտահերթ ընտրություններ։

«Կարծում եմ՝ այդ հարցը հետո կքննարկենք, հիմա պետք է դնեք վարչապետի հարցը։ Իսկ ընդհանրապես դրված է այն սկզբունքը, որ պետք է լինի խաղաղ, աշխատանքային միջավայր, որ բոլոր հացերը կարողանանք լուծել»,- ասաց Փաշինյանը։

Հարցին, թե վարչապետ ընտրվելու դեպքում կարո՞ղ է երաշխավորել, որ արատավոր երևույթները՝ կոռուպցիան, մենաշնորհները, օլիգարխիան վերանալու են, համակարգը կազմալուծվելու է, Նիկոլ Փաշինյանը պատասխանեց.

«Իհարկե, հակառակ դեպքում այս պրոցեսն իսկապես իմաստ չի ունենա, քանի որ հենց դա սկսեց այս ամեն ինչը»,- ասաց նա՝ հավելելով, որ մինչ այժմ այդ ամենն արել է ժողովրդի միջոցով և այդ խնդիրները ևս լուծելու է ժողովրդի միջոցով:

Փաշինյանը չպատասխանեց այն հարցին, թե որպես կառավարության աշխատակազմ այս հարցերում իրեն օգնող ո՞ւմ է տեսնում։

«Հիմա դրված է վարչապետի ընտրության հարցը, հետո կքննարկենք»,-ասաց նա։