Պահանջվում է վարչապետ

Հայաստանի ապագա վարչապետի հարցը դեռևս օդից կախված է: Ո՞վ է լինելու ՀՀ վարչապետ, այլ կերպ ասած՝ ղեկավար: Կարեն Կարապետյանի պարագայում մտավախություն կա, որ նա տոտալ կենթարկվի Ռուսաստանին, և արևմտյան ուժերին խաղալու քիչ տեղ կմնա: Այդ է պատճառը, որ արևմտամետ և Արևմուտքից ֆինանսավորող կառույցներ հետևողականորեն դեմ են Կարեն Կարապետյանին:

Նիկոլ Փաշինյանի՝ վարչապետ դառնալու պարագայում խնդիրը ոչ միայն դիպլոմի բացակայությունն է, այլև այն, որ զգուշանում են Նիկոլ Փաշինյանից՝ գուցե կուլակաթափ անի:

Բացի այդ, հայտնի չէ, թե ովքեր են կանգնած Նիկոլ Փաշինյանի հետևում, բացի ժողովրդից, իսկ որ Նիկոլ Փաշինյանի հետևում ուժեր կան՝ միանշանակ է:

Այդ մասին է խոսում նաև այն, որ Զարուհի Փոստանջյանը՝ որպես «երդվյալ» ընդդիմադիր, հայտարարում էր, որ Նիկոլը ծախված է ու շարժման ամբողջ ընթացքում նա իր ընդդիմադիրությունն էր անում Վանաձորում և չմիացավ Փաշինյանին: Արդյունքում նրան չթողեցին անգամ հրապարակում ելույթ ունենալ:

Դաշնակցությունը կարծես թե ևս ունի վարչապետի իր թեկնածուն, սակայն այս կուսակցությունը հայտնի է իր իշխանամտնելիությամբ և արդեն ծիծաղ ու կարեկցանք են հարուցում՝ վստահության փոխարեն: Իհարկե, կան գործիչներ ՀՅԴ-ում, ովքեր հասուն են քան Դաշնակցությունը, սակայն կուսակցությունը ոտքի ծայրից մինչև մազի ծայրը վարկաբեկել է իրեն, և մեկ ազնիվ մարդը չի կարող մաքրել Դաշնակցության բոլոր մեղքերը:

Ի դեպ, «մեյդանում» է հայտնվել Արթուր Բաղդասարյանը՝ ինչպես խոր քնից արթնացած գեղեցկուհին, և չի բացառվում, որ նա էլ իր քաղաքական նկրտումներն ունի, հակառակ դեպքում՝ ծանր տեղը չէր թեթևացնի և շարժման հաղթանակից հետո հայտնվեր ժողովրդի շարքերում:

Շրջանառվում է նաև Գագիկ Ծառուկյանի վարչապետության հարցը. իրադարձությունների նման շրջադարձի պարագայում ամեն ինչ հնարավոր է:

Իսկ ով ինչպես է PR-ը կազմակերպում:

Ինչպես միշտ Կարեն Կարապետյանն օգտագործում է վարչական ռեսուրսը՝ ինչպես օգտագործում էր:

Նիկոլ Փաշինյանը, լինելով լրագրող, ինքն է հրապարակայնորեն կազմակերպում:

«Դաշնակցությունը» պասիվ դիտողի՝ մեկ-մեկ դաշնակցական բաներ գրողի դերում է:

Արթուր Բաղդասարյանը սուրհանդակներ է ուղարկում աշխարհին, որ ինքը դեռևս ողջ է:

Գագիկ Ծառուկյանի փոխարեն՝ նրա կուսակիցներն են ավետում Գագիկ Ծառուկյանի խոսքը:

Կարծ ասած` վարչապետության տեղ կա. պահանջվում է վարչապետ:

Հ.Գ. Ի դեպ, տեղեկություն կա, որ ՀՀԿ-ն պատրաստ է վարչապետի աթոռը զիջել Փաշինյանին՝ մի պայմանով. եթե նա Ազգային ժողովը ցրի մեկ տարի հետո:

Չի բացառվում, որ ՀՀԿ-ում ծրագիր ունեն՝ հետքայլ անել, որ առաջքայլ անեն մեկ տարի անց: Մեկ տարին ժամանակ է վերակազմավորվելու և ստրատեգիա մշակելու համար, իսկ ՀՀԿ-ն և՛ ռեսուրսներ ունի՝ թե՛ մարդկային, թե՛ ֆինանսական, և՛ այսքան տարիների փորձառությունը նրանց վերածել է կայուն մակաբույծների:

Կանցնեն արիերգարդ՝ ավանգարդն ապահովելու համար: