Եթե «Ոսկե գնդակ», ապա միայն Մուհամմեդ Սալլահ

Եվրոպական ֆուտբոլն այս տարի մի փոքր այլ է։ Այս ամենի հետ մեկտեղ Գերմանիայում ու Ֆրանսիայում շարունակում է մնալ «Բավարիայի» ու «ՊՍԺ»-ի իշխանությունը։

Իտալիայում ամեն ինչ անորոշ է, քանի որ այդ առաջնությունն այս տարի հիացնում է բոլորին։ Մյուս կողմից` մասնագետներն արդեն հիմա նշում են, որ «Մեսսի-Ռոնալդու» իշխանության դարաշրջանը մոտենում է իր ավարտին։

Այս տարի ֆուտբոլային աշխարհի համար ամենամեծ բացահայտումը եղավ եգիպտացին՝ Սալլահը։ Այս տղան հիացնում է իր խաղով բոլորին։ Նախորդ մրցաշրջանում այս տղայի մասին երկակի կարծիքներ կային։ Նրան համարում էին ֆուտբոլիստ, ով միայն կարողանում է գնդակն իր առաջ գցել ու արագ վազել, սակայն այս տարի այս կարծիքները վերացան։

Սալլահը միակն է, ով ոչ միայն կարող է մրցակցել, այն նաև գերազանցել է Մեսսի-Ռոնալդու զույգին։ Այս տղան ունի ֆենոմենալ արագություն, դրիբլինգ, կարողանում է ամենաանհավանական ու դժվար իրավիճակներում գտնել ելք։

Մեծ հաշվով Սալլահը ոչ մի նորություն չի մտցրել ֆուտբոլի մեջ, սակայն նա իր պարզությամբ կարողանում է անել այն, ինչ այս տարի չի կարողանում անել ոչ ոք։
«Ոսկե գնդակի» համար պայքարում ֆուտբոլային վերլուծաբանները տեսնում են Սալլահ-Ռոնալդու դիմակայություն ու շատերը նույնիսկ նշում են, որ այս դիմակայությունում նշանավոր կլինի Չեմպիոնների լիգան ու Աշխարհի առաջնությունը։

Փաստացի Ռոնալդուն ձախողեց մրցաշրջանի առաջին մասը ու այդ հատվածում Սալլահը ցույց տվեց իր ֆենոմենալ խաղը, իսկ երկրորդ մասում Սալլահն ավելի ավելացրեց իր խաղի ուժը, իսկ Ռոնալդուն դարձավ իսկական գոլահար մեքենա։

Մյուս կողմից՝ պետք է նշել, որ լավագույն ֆուտբոլիստի կոչման համար շատ ժամանակ չեն առաջնորդվում խփած գոլերով, քանի որ եթե այդպես լիներ, ապա Ռոբերտ Լևանդովսկին պետք է իր գոլերի համար ստանար «Ոսկե գնդակ», բայց․․․․․

Բայց շատ ժամանակ անգամ ֆուտբոլասերներն ու ֆուտբոլի մասնագետներն են դժգոհ լինում «Ոսկե գնդակից», քանի որ շատերի կարծիքով Մեսսիի ու Ռոնալդուի այդքան մրցանակները, մեղմ ասած, այդքան էլ ճիշտ չեն։ Մրցաշրջանն ավարտվում է, սակայն առջևում դեռ պատասխանատու խաղեր կան Չեմպիոնների լիգայում ու մի ամբողջ Աշխարհի առաջնության մրցաշար։

Այդ ամենից հետո միայն կերևա, թե ով է ավելի լավը՝ Ռոնալդո՞ւն, թե՞ Սալլահը։ Սակայն այս պահի դրությամբ Սալլահն ավելի արժանի է այդ մրցանակին, քան գոլահար Ռոնալդուն։

NEWSPRESS.am SPORT