Աստված ոչ անի, որ հիասթափություն լինի. Անահիտ Բախշյան

Երևանի ավագանու «Ելք» խմբակցության անդամ Անահիտ Բախշյանը կասկած չունի, որ մայիսի 1-ին ԱԺ նիստում Նիկոլ Փաշինյանն ընտրվելու է վարչապետ։

Անահիտ Բախշյանը NEWSPRESS.am-ի հետ զրույցում մատնանշում է Նիկոլ Փաշինյանի «Ուրվագիծ» հաղորդաշարին տված հարցազրույցը։ Բախշյանի խոսքով՝ Փաշինյանը կամաց-կամաց սկսում է խոսել ծրագրերից։

«Այն, ինչ ասում է Նիկոլը, հուսադրող է, բայց դա քիչ է: Անշուշտ, Նիկոլն էլ է շատ լավ հասկանում, որ դա քիչ է․ հասարակությունն ակնկալում է ավելի հեռանկարային տեսլական և լուրջ վերլուծություն կամ քայլեր՝ երկրի ամբողջական կարգուկանոնը հաստատելու և կառավարման ձևի և բովանդակության մեջ փոփոխություն անելու»։

Անահիտ Բախշյանի խոսքով՝ այն, որ Նիկոլ Փաշինյանը ՀՀԿ մեծամասնությանը մերժում է՝ ճիշտ է, իրենք ևս մերժում են, բայց ՀՀԿ-ում էլ կան մարդիկ, ովքեր իրենց գործը կարող են շարունակել նոր, ժողովրդավարական Հայաստանում։ Նա նկատում է, որ մի կողմից Փաշինյանը հայտարարում է, որ քինախնդրություն, վենդետա չի լինելու, մյուս կողմից՝ պայքարում է ամբողջ թիմի դեմ։

«Որքան Նիկոլն այսօր բաց լինի և քննարկումների արդյունքում ձևավորի խմբեր, որտեղ կմասնակցեն մեր հասարակության գիտակից մարդիկ, ովքեր ազնիվ են, վարկաբեկված չեն, այնքան նրա հետևից գնացողների թիվը կավելանա»,- ասում է Անահիտ Բախշյանը։ Նա հավատում է Փաշինյանին, բայց և նկատում, որ հանրահավաքի հարթակում միայն «Քաղաքացիական պայմանագրի» անդամներն են և մի քանի համախոհներ։

Անահիտ Բախշյանը կրկնում է Արթուր Ղազինյանի դիտարկումը։ Վերջինս նշել էր. «Նիկոլը չափացանց գրագետ ու անթերի արեց իր գործը, և մենք նրա մեջ տեսնում ենք վարչապետին, բայց չենք տեսնում Նիկոլ Փաշինյան քաղաքական գործչին, որը պատրաստ է պետության բոլոր օղակներն իրար կապել և այդ օղակների նկատմամբ հասարակության կողմից վստահություն առաջացնել»։

«Ելք» խմբակցության ավագանու ներկայացուցիչը հավատում է Նիկոլին, բայց և նկատում, որ անհրաժեշտ է տարակարծություն՝ ծրագրի քննարկման շուրջ: Ընդ որում՝ այդ ծրագիրը չպետք է նման լինի ՀՀԿ-ի ծրագրին, իսկ դրա համար պետք է բանակ աշխատի։

Անահիտ Բախշյանը նկատում է, որ քաղաքական լուրջ դեմքեր կան, ովքեր իսկապես ուզում են լինել Նիկոլի կողքին, բայց անգամ Նիկոլի թիմակիցները (նկատի ունի «Ելքը»- հեղ.), այսօր հարթակում չեն, քանի որ Փաշինյանը թույլ չի տալիս։

«Սխալ է շարժվել այն սկզբունքով, թե ով մեզ հետ չի քայլել Գյումրիից մինչև Ֆրանսիայի հրապարակ, մեզ հետ չէ: Դա նույն Հանրապետականի մոտեցումն է, և սա մտահոգում է շատերին։ Իմ լավ քաղաքական գործիչներից մեկը գրել էր, թե՝ «ես այլևս չեմ ուզում, որ ինձ հրապարակից ասեն՝ ես անեմ»․ այս լոզունգն ու այս մտածելակերպը պետք է Նիկոլն արմատապես ցրի ու մինչև դա չանի, մտահոգությունը չի վերանա: Աստված ոչ անի, որ հիասթափություն լինի հենց այդ հողի վրա»,- նշում է Անահիտ Բախշյանը։

Նրա դիտարկմամբ՝ լավ է, որ նոր քաղաքական ուժեր են իրենց ցանկությունը հայտնել միանալու շարժմանը, քանի որ ԱԺ-ում ձայներ կապահովեն Նիկոլի համար, սակայն մյուս կողմից էլ Փաշինյանին դա չպետք է պարտքի տակ դնի, և նա չպետք է իրեն պարտավորված զգա՝ իշխանություն կիսելու հարցում։