Ինչպես որոշի ժողովուրդը, այնպես էլ կլինի «Ծառուկյան» դաշինքն ու Գագիկ Ծառուկյանը․ Միքայել Մելքումյան

Սա բացառիկ ու աննախադեպ շարժում էր։ «Ուրվագիծ» հաղորդաշարի ժամանակ ասաց «Ծառուկյան» դաշինք խմբակցության անդամ, ԱԺ փոխխոսնակ Միքայել Մելքումյանն անդրադառնալով Նիկոլ Փաշինյանի «Իմ քայլը» նախաձեռնությանը։

Նրա որակմամբ՝ սա լրջագույն շարժում է, որը միտված է պետության ապագայի կերտմանը։

«Հալալ է մեր ժողովրդին և շարժման լիդերներին, որ կարողացան»,- ասաց Մելքումյանը։

Նա այս հարցում անդրադարձավ նաև «Ծառուկյան» դաշինքի դիրքորոշմանը։

«Ինչպես կլինի ժողովուրդը, այնպես էլ կլինի նոր կառավարությունը և նրա ղեկավարը։ Ժողովուրդը միշտ ճիշտ է և ինչպես նա որոշի, այնպես էլ կլինի «Ծառուկյան» դաշինքն ու Գագիկ Ծառուկյանը»,-ասաց ԱԺ փոխխոսնակը։

Նրա որակմամբ՝ անցած 10 տարվա ընթացքում մենք ունեցանք ունիտար պետություն, կիսաֆեոդալական համակարգ՝ դեմոկրատական շղարշի տակ։ Միքայել Մելքումյանի խոսքով՝ Հայաստանը երկիր էր, որտեղ բոլորը կախված էին մի մարդուց՝ Սերժ Սարգսյանից, որը ստեղծում էր անազատությունների ինստիտուտ։

«Սա խայտառակություն էր։ Համակարգն այնպես էր ձևավորվել, որ խարիսխներ էր գցել դատական, իրավական և բոլոր համակարգերում։ Սա խայտառակ կիսաֆեոդալական օրգանիզմ էր, ծնել էր անարդարություն։ Եվ ժողովուրդն անվտանգություն և արդարություն էին ուզում»,-ասաց Մելքումյանը։

Խոսելով ապրիլի 17-ին տեղի ունեցած՝ Սերժ Սարգսյանի վարչապետության քվեարկության մասին՝ նա նշեց, որ «Ծառուկյան» խմբակցությունից կողմ էին քվեարկել բիզնես ունեցողները և նրանք, ովքեր ինչ-որ չափով վերոհիշյալ կախվածության մեջ էին Սերժ Սարգսյանից։

«Հիմա մենք շանս ունենք նորմալ մտածողության երկիր դառնալու, որտեղ չի լինի վախն ու քծնանքը»,-ասաց Մելքումյանն ու հավելեց․ «Դուք միայն տեսնեիք, թե բարձր կալիբրի պաշտոնյաներն ինչպես էին քծնում․․․»։

Միքայել Մելքումյանն անդրադարձավ նաև վարչապետի թեկնածուի և ժամանակավոր կառավարության ձևավորման հարցին։ Նրա դիտարկմամբ՝ արդար ընտրություն անցկացնելու համար պետք է նաև Ընտրական օրենսգրքում որոշ փոփոխություններ կատարել։ 

«Մենք նաև խոսում ենք բանակցության մասին, որտեղ անպայման պետք է կոնսենսուս լինի։ Սուպերվարչապետի ռեսուրսները պետք է ապակենտրոնացնել։ Այսինքն՝ որպեսզի մտավախություն չլինի որևէ մեկի կողմից, որ ժամանակավոր վարչապետը կարող է դառնալ այն հին համակարգի կրողներից մեկը՝ անկախ իր բովանդակությունից»,-ասաց Մելքումյանը։ 

Բացի այդ, նրա խոսքով, կոնսենսուս պետք է լինի նրա շուրջը ձևավորված քաղաքական ուժերի միջև, որը կներշնչի վստահություն միմյանց հանդեպ։

Օրենսգրքի հետ կապված՝ նա իր դժգոհությունը հայտնեց ռեյտինգային համակարգից, որը, ԱԺ փոխխոսնակի գնահատմամբ, քարուքանդ անող համակարգ է։ Ըստ Մելքումյանի՝ պետք է լինի 100 տոկոսանոց համամասնական ընտրական համակարգ։

«Փակ ծրար, բաց ծրար, չգիտեմ ինչեր-ինչեր պետք է վերանան և հասկանալի ԸՕ պետք է լինի, որը մարդը գնա ու առանց դժվարության ընտրի»,- նկատեց Մելքումյանը։

Նրա հաշվարկներով՝ ժամանակավոր կառավարության գործունեության ընթացքում, կլինի դա մեկ կամ երկու ամիս, թե մաքսիմում երեք ամիս, կարելի է կատարել 4-5 պարզ քայլ, որոնք չեն պահանջում ֆինանսական ներդրումներ, միջազգային վարկեր կամ տնտեսական ռեսուրսներ։

Սակայն որպեսզի այդ ընթացքում տնտեսությունն անդառնալի կորուստներ չունենա, հարկավոր է 2-3 օրում լուծել այդ խնդիրը։

«Այսօր երկրում պարալիզացված վիճակ է․ չեն գործում շատ կազմակերպություններ, ուսումնական հաստատություններ։ Սա անհապաղ լուծում է պահանջում։ Իսկ երբ ԱԺ-ում կլինի նոր վարչապետի ընտրություն և կառաջադրվեն ֆրակցիաները, 2-3 օրում պարզ կլինի, թե կոնսենսուսն ինչի շուրջ է։ Բայց կունենանք անդառնալի կորուստներ, եթե դե յուրե անիշխանության վիճակը երկրում շարունակվի, դե յուրե, քանի որ այսօր իշխանության տերը ժողովուրդն է»։

Միքայել Մելքումյանի որակմամբ՝ պետության ղեկավարը պետք է ունենա քաղաքական բովանդակություն, իսկ դրանից զուրկ կառավարության ղեկավարը պետք չէ։

Ինչ վերաբերում է ԲՀԿ-ին, ապա նա իր ծրագրերն ունի և դրանց մասին խոսվում է արդեն երկար ժամանակ։ 

«Գագիկ Ծառուկյանն իր ֆինանսական մեծ ներդրումները միշտ ունեցել է տարբեր ոլորտներում, և այս ցենզը միշտ պահպանվում է։ Բայց նորից եմ կրկնում՝ կվարվենք այնպես, ինչպես կորոշի ժողովուրդը»,- եզրափակեց Մելքումյանը։