Նոր զարգացումներ՝ վարչապետի թեկնածուի ընտրության հարցում. ժողովուրդը նոր թեկնածո՞ւ ունի

Նոր զարգացումներ են տեղի ունեցել «Իմ քայլը» շարժման ակտիվիստների շրջանում: Ցուցարարների շարքում «Բարգավաճ Հայաստան» կուսակցության անդամների հայտնվելուց հետո, ակտիվիստների մեծ մասը փոխել է իր դիքորոշումը վարչապետի ընտրության հարցում: Նրանք, մինչ այս այլընտրանք չեն ունեցել և գերադասել են ՀՀԿ-ական վարչապետի փոխարեն տեսնել Նիկոլ Փաշինյանին. այժմ նշում են, որ իրենց հնարավորություն է տրվել նաև նոր թեկնածու տեսնել:

Համենայնդեպս, NEWSPRESS.am-ի հարցումների արդյունքում պարզվել է, որ ցուցարարներից շատերը հակված են ՀՀ վարչապետի պաշտոնում տեսնել ԲՀԿ նախագահ Գագիկ Ծառուկյանին:

«Ապրի Նիկոլը, լավ տղա ա, էսքան մարդուն ոտքի հանեց, բայց շատ ուրախ եմ, որ Ծառուկյանը միացավ մեզ, ես նրա ցավը տանեմ, այ իսկական վարչապետը»,- մեզ հետ զրույցում ասաց ցուցարարներից մեկը: Հարցին, թե իսկ չէի՞ք ցանկանա Փաշինյանը վարչապետ դառնա, տղամարդը պատասխանեց, «Ա՛յ քո հոգուն մեռնեմ, Փաշինյանը որ մեզ չհաներ, մենք դուրս եկողը չէինք, բայց շատ կուզեի՝ Ծառուկյանը լիներ»:

Ավելի երիտասարդ հարցվողներից մի քանիսն էլ նշեցին, որ ուրախ են, որ Փաշինյանն իրենց ոտքի հանեց ու իրենք այսօր իսկական ժողովրդավար երկիր ձևավորելու մեջ իրենց լուման են ներդնելու, և գոհունակություն հայտնեցին, այսօր շարժմանը մեծ ուժեր են միանում:

Հարցին՝ օրինակ ո՞ւմ կուզեիք այդ ուժերից տեսնել կառավարության կազմում, երիտասարդներից մեկը՝ Արմենը, պատասխանեց. «Օրինակ՝ հիմա, որ Գագիկ Ծառուկյանը միացավ մեզ, ես իսկապես կուզեմ իրեն տեսնել վարչապետ: Ճիշտ ա, ինքը մի քիչ ուշացավ ու առաջին փուլում մեզ հետ չէր, բայց պայքարն առջևում ա, հիմա ավելի կարևոր խնդիր ենք լուծելու՝ ՀՀԿ-ին չեզոքացնելու ենք, ու Ծառուկյանը հաստատ էն մարդն ա, ով կանգնելու ա ժողովրդի կողքին ու օգնի նրան: Չգիտեմ, ես կուզեմ, որ նա լինի վարչապետ»,- ասաց Արմենը:

Նա իր ընկերոջ՝ Սուրենի հետ էր: Այս երիտասարդն էլ վստահեցրեց, որ ինքը ևս կցանկանար Գագիկ Ծառուկյանին տեսնել վարչապետ:

Հարցին, թե նախաձեռնությանը միացել են նաև այլ քաղաքական ուժեր, օրինակ՝ ՀՅԴ-ն, «Լուսավոր Հայաստանը» և սատարում են ժողովրդական շարժմանը, արդյո՞ք այդ ուժերի մեջ չկան վարչապետի թեկնածուներ, Սուրենը պատասխանեց:

«Անկեղծ եմ ասում, մենք շատ ուրախ ենք, որ էսօր շատ ուժեր հասկացան, որ ժողովրդի ձայնը որոշիչ է ու միացան մեզ, դա մեր հաղթանակն է, բայց ես միշտ էլ ասել եմ, որ Ծառուկյանը մեր մարդն ա, այսինքն՝ նա, ով միշտ էլ ժողովրդի կողքին ա եղել՝ անկախ նրանից՝ ընդդիմություն ա եղել, թե իշխանություն»:

NEWSPRESS.am-ը խոսել է նաև այլ ակտիվիստների հետ, որոնցից մի քանիսն այսօր արդեն, երբ շարժմանը սատարում են այլ ուժեր, այնքան էլ կողմնորոշված չեն, թե կոնկրետ ում կընտրեն: Նրանցից մի քանիսը պատասխանեցին. «Դեռ կերևա»…