ԿԲ նախագահի նոր տեղակալի աշխատավարձը տարեկան կկազմի 25 միլիոն դրամ

Կենտրոնական բանկի նախագահի նոր տեղակալի աշխատավարձը կկազմի տարեկան կտրվածքով 25 միլիոն դրամ, ինչն ամսական կազմելու է 2 միլիոն դրամ: ԱԺ-ում անդրադառնալով այս հարցին «Բարգավաճ Հայաստան» խմբակցության պատգամավոր Տիգրան Ուրիխանյանը նկատեց, որ ծանր սոցիալական-տնտեսական իրավիճակի համատեքստում, երբ չկան բավարար միջոցներ լուծելու սոցիալական բոլոր խնդիրները, արժե՞ այս գումարը տրամադրել ԿԲ մեկ տեղակալին:

Ի պատասխան ԿԲ նախագահ Արթուր Ջավադյանը ասաց, որ բացի այն, որ իրենց աշխատավարձերը օրենքով են ֆիքսված, բանկային աշխատողների համեմատ իրենց աշխատավարձերը 5-ից մինչև 7-8 անգամ ցածր են:

Տիգրան Ուրիխանյանը չէր նահաջում. «Ախր հիմա տեսեք՝ ինչ է ստացվում: Հարցը պետական միջոցների մասին է: Պետական փողը պետք է տնտեսել, պետության փողերը սուղ են: Կարմիր թելի պես տանում են առողջապահության համար անհրաժեշտ առկա գումարների հարցը ու մեր ժողովուրդը լսում ու տեսնում է, թե մի հարգարժան պաշտոնյա ասում է՝ թե ինչ բիզնեսից եք խոսում, իմ բիզնեսը մեծ է, դուք ասում եք, թե աշխատավարձը համարժեք է: Երկրի նախագահից, վարչապետից ավելի բարձր աշխատավարձ ունի ձեր տեղակալը, այս սովի պայմաններում»:

Արթուր Ջավադյանն էլ շեշտեց, թե այդպիսին է միջազգային փորձը: «ԿԲ-ն, ըստ էության, բանկ է՝ օժտված գործառույթներով»: