Հայաստանի լուսավոր ապագան կախված է թարս աճած խիարից

Նախօրեին Սերժ Սարգսյանը հայտարարել է, որ 2019թ.-ի հունվարի մեկից, հնարավոր է՝ թոշակներն ու նվազագույն աշխատավարձերը բարձրանան:

Արդեն մի քանի տարի է, ինչ ոչ թոշակները, ոչ էլ նվազագույն աշխատավարձը չեն բարձրանում և այդ «բեռը» թողել են արդեն վարչապետ Սերժ Սարգսյանի ուսերին, որ  որպես վարչապետ «լավամարդ» դառնա:

Այս տարիներին երկրում խորացել է աղքատությունը, սիրողական հաշվարկներով յուրաքանչյուր 3-ից մեկն աղքատ է, իսկ իրականում՝ երկրի բնակչության զգալի հատվածն է աղքատ:

Սերժ Սարգսյանը հանուն վարչապետության բարձրացումներ չէր անում, որ իր ձեռքով անի և հայտարարի, իսկ ժողովուրդն այդ ընթացքում թող արտագաղթի, թող սոված մնա, կարևորը վարչապետությունն է:

Այս ընթացքում մարդիկ հիվանդանոցներ չեն դիմում, առողջական խնդիրները հնարավորինս լուծում են տնային պայմաններում, երեխաներին չեն կարողանում կրթության տալ, չեն կարողանում հավուր պատշաճի տանիք ապահովել իրենց համար և այդ ամենը հայ ժողովուրդն անում է հանուն Սերժ Սարգսյանի վարչապետության. տոկում է, ինչպես կարողանում է, իսկ ինչպե՞ս է վարչապետը պատասխանելու տարիների դատարկությանը, աղքատությանը, արտագաղթին և տառապանքին:

Միշտ էլ կունենա գրագիր՝ քիչ թե շատ խելացի, ով արդեն վարչապետի փոխարեն կգրի ժողովրդի վարչապետական ճառընտիրը՝ ընտրելով ամենագեղեցիկ բառերը: Ի դեպ, Սերժ Սարգսյանը հանրության ատելությանը պատասխանում է սիրով՝ բարձրացնելու է ինչ-որ ժամանակ թոշակներն ու նվազագույն աշխատավարձերը:

Ահա այսքան է Սերժ Սարգսյանը սիրում իր ժողովրդին՝ աղքատության, արտագաղթի, հուսահատության մեջ, սակայն որոշել է ժողովրդին հանել աղքատությունից և հուսահատության ճիրաններից:

Եվ իհարկե, Սերժ Սարգսյանը շարունակում է մնալ անուղղելի ռոմանտիկ՝ մինչև 2040թ.-ը Հայաստանում բնակչության թիվը հասնելու է 4 մլն-ի: Ահա այս է պակասում հայ ժողովրդին՝ հավատը, և միակ մարդը, գուցե, ով հավատում է լուսավոր Հայաստանին և ինքն իրեն՝ անվերապահորեն, և 2040թ.-ի 4 մլն բնակչությանը:

Եվ այս պահին մերժել ՀՀ միակ հավատավոր և լուսավոր անձնավորությանը՝ այնքան էլ ճիշտ չէ. չէ՞ որ մարդու մեջ կարող են սպանել հավատը այդ լուսավոր Հայաստանի նկատմամբ և եթե իրոք մեկ հոգի հավատում է, ապա սիրուն չէ այդ հավատը ոտնատակ անել, հակառակ դեպքում՝ վարունգ կբուսնի լուսավոր ապագայի փոխարեն:

NEWSPRESS.am