Բոլորը պարում են, անկախ նրանից, թե ում մոտ որ շարժումն ինչպես է ստացվում. հանդիպում քառօրյայում վիրավորված զինվորների հետ (ֆոտո)

«Դիրքապահ» քառօրյա պատերազմի մասնակիցների միավորում հասարակական կազմակերպությունն անցկացրեց հերթական ժամանցային երեկոն։ Երեկոյին մասնակցում էին քառօրյա պատերազմի ժամանակ ծանր վիրավորում ստացած տղաները։ Ծրագրի նպատակն էր հոգեբանական աջակցություն ցուցաբերել վիրավոր տղաներին։ «Դիրքապահ» քառօրյա պատերազմի մասնակիցների միավորման ողջ անձնակազմի անունից շնորհակալություն ենք հայտնում ծրագրի աջակիցներին։

Ժամանցային երեկոն անցավ շատ հետաքրքիր մթնոլորտում․ բոլոր վիրավոր տղաները պարեցին, ուրախացան։ Հնչեցին մի շարք հայրենասիրական երգեր, որոնք էլ ավելի բարձրացրին պատերազմի մասնակից հերոս տղաների տրամադրությունը։

Վիրավոր տղաները նշում են, որ իսկապես շատ են օգնում իրենց այսպիսի միջոցառումները․ իրենք ևս երիտասարդներ են և ուզում են բոլորի նման երգել, պարել, բայց այդպիսի հնարավորություն չի լինում։ Իրենք ամեն միջավայրում չեն պարի, իսկ այսպիսի ընկերական միջավայրում, երբ իրենց կողքին են մնացած վիրավորները, ու, բոլորը պարում են, անկախ նրանից, թե ում մոտ որ շարժումը ինչպես է ստացվում։

Վիրավոր տղաների համար սա մեծ հոգեբանական օգնություն է, որ գոնե մի քանի ժամով կտրվում են հոգսերից, վերականգնողական բուժումներից և լավ ժամանակ են անցկացնում։ «Դիրքապահ» քառօրյա պատերազմի մասնակիցների միավորումը ցանկանում է շարունակական դարձնել այսպիսի միջոցառումը և դիմում է բոլոր այն մարդկանց, ովքեր կարող են օգնել այսպիսի միջոցառումներով աջակցել վիրավոր տղաներին։ Մենք գիտենք, որ դեռ շատ բարի ու լավ մարդիկ կան ու նյութականից բացի իրենց ներսում ունեն մարդկային մեծ արժեքներ։ Մեր ծրագրերը շարունակական են լինելու այս ուղղությամբ, քանի որ բոլոր վիրավոր տղաները, ովքեր մասնակցել են այսպիսի ծրագրերի, նշում են, որ շատ կարևոր է այն և շատ օգտակար իրենց համար։ Մեր նպատակն է, որ վիրավոր տղաներն իրենց թերի չզգան, անկախ նրանից ոտք, ձեռք ունեն, թե չունեն, նրանք կարող են երգել, պարել, ու որպես երիտասարդ իրենց զգալ։ Իրենց ներսում կա հոգի, որը մեր բոլորիս հոգիների նման ուզում է ուրախանալ։