Նիկոլ Փաշինյանն ապահով հասավ Երևան

Նիկոլ Փաշինյանի քայլարշավը բարեհաջող ավարտվում է: Հետաքրքիրն այն է, որ այս ակցիան ոչ միայն լայն լուսաբանվեց, ենթարկվեց վերլուծության, այլ նաև իրավապահներն աչք փակեցին այն մանր-մունր օրինախախտումների վրա, որոնք նախկինում միտինգների և ակցիայի մասնակիցներին չէին ներվում:

Հիշեցնենք, որ նախկինում շատ սահմանափակ էին լուսաբանվում ընդդիմության ակցիաները, մարդկանց փորձում էին ավելի քիչ քանակությամբ ցուցադրել, փակում էին մարզերից դեպի Երևան գնացող ճանապարհները, ոստիկանները ստուգում էին գրեթե բոլոր մեքենաները, և ահա, այս ակցիայի համար, պարզվում է, որ որևէ խոչընդոտ չկա՝ և՛ կարելի է և լայնորեն լուսաբանել, և՛ ճանապարհներն են բաց:

Ի դեպ, հիշեցնենք Freedom House-ի զեկույցի մասին, որտեղ նշվում է, որ Հայաստանը հետընթաց ունի ժողովրդավարության ոլորտում: Եթե Freedom House վերլուծաբանները տեսնեին, թե ինչպես է լուսաբանվում ընդդիմության քայլարշավը, և թե ինչ սիրով են վերաբերվում իշխանությունները Նիկոլին, ապա իրենց կարծիքը ՀՀ ժողովրդավարության վերաբերյալ արմատապես կփոխեին:

Չի բացառվում (հոգուս մեղք վերցնեմ-հեղ.), որ Նիկոլ Փաշինյանն իր այս քայլերթով փորձում է աշխարհի աչքին բարձրացնել ժողովրդավարական Հայաստանի վարկանիշը: Ինչևէ:

Հենց այն, որ ոչ ոք չի խոչընդոտում, կարգի չի հրավիրում քայլերթի փոքր-փոքր անօրինականությունները, ապա այս իրավիճակը պետք է բացատրություն ունենա:

Կա՛մ այս ակցիան հավանության է արժանացել իշխանությունների կողմից, կա՛մ էլ իշխանություններն են առաջարկել Նիկոլ Փաշինյանին՝ ի սեր երկրի ժողովրդավարական դեմքի փրկության՝ ստանձնել ժողովրդավական մոխիրներից Հայաստանի համբարձման ծանր բեռը:

Մեկ օր ընդդիմություն, մեկ օր իշխանություն. չէ՞ որ բոլորս աշխատում ենք մեր երկրի համար, մեկ քայլ այս կողմ, մեկ քայլ այն կողմ, ոչինչ չի փոխի: Ի վերջո, Հայաստանում երբեք էլ իշխանություն-ընդդիմություն կապն այդքան ամուր չի եղել, ինչպես վերջին 10-ամյակում: Դա է Հայաստանի ձեռքբերումը, և աշխարհը, անգամ՝ Freedom House-ը, չի գնահատում ձեռքբերած անձեռքբերելին:

Ի դեպ, սիրո մասին: Իշխանություններն այնքան մեծ սիրով են պարուրել Նիկոլին, չէ՞ որ շատ քիչ մարդ կհամաձայներ այն դերակատարումն ունենալ հայրենի քաղաքականության ընդդիմության և իշխանության սահմանագծին: Նիկոլը համաձայնել է ունենալ: Այդքանով իշխանությունն ընդդիմությունից գոհ է. կարծես թե գտել է արժանավորին:

NEWSPRESS.am