Սուրեն Կարայանը դռնփակ կառավարության «Նոյի ագռավն» է, Դավիթ Հարությունյանը՝ փաստաբանը

Այսօր կայացել է կառավարության առաջին դռնփակ նիստը, իսկ թե ինչ է տեղի ունեցել և ինչպես՝ լուր էր բերել ՀՀ տնտեսական զարգացման ու ներդրումների նախարարի պաշտոնակատար Սուրեն Կարայանը:

«Նիստի ընթացքում բավականին բուռն քննարկումներ են տեղի ունեցել։ Խնդիրը նրանում չէ, որ ավելի ազատ ենք արտահայտվել, միշտ էլ ազատ ենք, բաց ու թափանցիկ: Պարզապես այսօրվանն առանձնահատուկ էր ոչ միայն նրանով, որ առաջին փակ նիստն էր, այլ նրանով, որ լայն օրակարգ ուներ»,- ասել է Կարայանը և հավելել, որ կառավարության նիստերի բաց, թե փակ լինելու առումով տարբերություն չի զգում:

Ի տարբերություն Սուրեն Կարայանի՝ ՀՀ արդարադատության նախարարի պաշտոնակատար Դավիթ Հարությունյանը բուռն զգացողություններ է ունեցել կառավարության դռնփակ նիստից։

«Կառավարության այսօրվա դռնփակ նիստը տևել է ավելին, քան նախորդ անգամները: Որպես կանոն` կես ժամ տևող նիստը տևել է մեկուկես ժամ: Կարծում եմ, որ սա խոսուն հանգամանք է, որի մասին կարելի է փոքր-ինչ խորհել: Իրականում արդարացավ կառավարության նիստերը դռնփակ դարձնելու որոշումը, և դրա վառ ապացույցն այսօրվա նիստն էր՝ և՛ բովանդակային, և՛ հարցադրումների առումով»,- ասել է Դավիթ Հարությունյանը։

Ի տարբերություն Կարայանի՝ Դավիթ Հարությունյանի զգացողությունների վրա կարելի է զարմանալ․ միգուցե երկուսն էլ տարբե՞ր նիստերի են մասնակցել։ Փաստը մնում է փաստ, որ Դավիթ Հարությունյանը հող է նախապատրաստում Սերժ Սարգսյանի համար և նա իրավունք ունի իրականությունը ծուռ հայելիների միջոցով ներկայացնելու, չէ՞ որ նա հայկական արդարադատությունն է ներկայացնում։

NEWSPRESS.am