Ինչպես «Հռոմեացի գլադիատորները» դուրս շպրտեցին «Բարսելոնա»-ի «լոպազներին»

«Ռոմա» 3-0 «Բարսելոնա»։ Այս հաշիվը, հանդիպումն ու դիմակայությունը դեռ երկար կհիշի ֆուտբոլային աշխարհը։ Երբ տեղի էր ունենում Չեմպիոնների լիգայի խաղարկության ¼ եզրափակչի վիճակահանությունն ու պարզ դարձավ, որ կատալոնացիները մրցելու են «Ռոմա-ի» հետ, բոլորը սկսեցին շնորհավորել «Բարսելոնա»-ին՝ հաջորդ փուլ դուրս գալու կապակցությամբ։

Այդ վիճակահանությունից հետո շատ սպորտային պարբերականներ հրապարակեցին հռոմեական թիմի լեգենդար ֆուտբոլիստ Ֆրանչեսկո Տոտտիի էմոցիոնալ դեմքը, երբ իմացավ, որ իրենց թիմը մրցելու է «Բարսելոնա»-ի հետ։

Արդեն առաջին հանդիպման ժամանակ, որտեղ «Բարսելոնան» հաղթեց 4-1 հաշվով, երևում էր, որ Լիոնել Մեսսին չի կարողանում ճեղքել իտալացիների տուգանային հրապարակը։ Եթե թերթենք Չեմպիոնների լիգայի նախորդ խաղարկությունների էջերն ու տեսնենք տեսանյութերը՝ հստակ կերևա, որ Մեսսիին ամենալավը կարողանում են չեզոքացնել իտալական թիմերը։ «Միլան»-ը, «Ինտեր»-ը, «Յուվենթուս»-ն ու «Ռոմա»-ն այն թիմերն են, որոնց հետ հանդիպման ժամանակ Մեսսին կամ չի կարողացել իրեն զգալ այնպես ազատ, ինչպես մյուս թիմերի հետ հանդիպումների ժամանակ էր անում, կամ էլ բացարձակ չի երևացել խաղադաշտում։

Ամբողջ աշխարհին է հայտնի ու ամբողջ աշխարհն է խոսում իտալական թիմերի պաշտպանության մասին։

Այդ ամենը հստակ երևաց դեռ առաջին հանդիպման ժամանակ։ Սակայն այստեղ խնդիրը Մեսսիի մեկուսացումը չէր։ Ռոման թույլ չտվեց, որ կատալոնացիները խաղան իրենց ֆուտբոլը։ Ու որքան էլ տարօրինակ է, համեստ հարձակվողական գիծ ունեցող «Ռոմա»-ն կարողացավ «Բարսելոնա»-ին խոցել այդքան շատ գնդակներով։

«Բարսելոնա»-ն Հռոմ եկել էր այն վստահությամբ, որ շատ հեշտ կհակագրոհի ու կհաղթի, սակայն․․․

Սակայն «Բարսա»-ն պատժվեց, քանի որ թերագնահատեց մրցակցին։ «Բարսելոնա»-ն կարող էր պատժվել և առաջին հանդիպման ժամանակ, որտեղ թերագնահատելու արդյունքում հրաշքով փրկվեց մի քանի գոլերից։ Շատերն այս հանդիպումը համարում են հրաշք, սակայն իրականում «Ռոմա»-ն հաղթեց, քանի որ կատալոնական թիմի աստղերը թերագնահատեցին իրենց մրցակցին։ «Ռոմա»-ն հաղթեց, քանի որ թիմի ֆուտբոլիստներն անտեսեցին կատալոնական թիմի մասին միֆերն ու պայքարեցին։ «Ռոմա»-ն հաղթեց, քանի որ թիմը հավատաց, պայքարեց ու կռիվ տվեց աշխարհի ամենաուժեղ թիմերից մեկի հետ։

«Ռոմա»-ն հաղթեց, քանի որ այդ թիմի տղաները կռվեցին ու կարողացան կերտել պատմական հաղթանակ։ Այս հաղթանակի մեջ պատահականություն չկա, քանի որ նրանք հաղթեցին մի թիմի, որը թերագնահատեց իրենց։

NEWSPRESS.am Sport