Էլ գող փիսո, էլ քաչալ շուն. Զոհրաբյանն ու Աշոտյանը չեն մոռանում իրենց թշնամությունը

ԱԺ-ում ՀՀ-ԵՄ շրջանակային պայմանագրի քննարկման ժամանակ, ՀՀ ԱԺ ՀՀԿ-ական պատգամավոր, Արտաքին հարաբերությունների հանձնաժողովի նախագահ Արմեն Աշոտյանն ու Նաիրա Զոհրաբյանը, հիշելով իրենց մեջ առկա հին կռիվները, բաց չթողեցին մեկը մյուսին վիրավորելու և ինչ-որ բաներ հասկացնելու առիթը:

Հարցնող լինի, թե՝ արտաքին հարցեր քննարկելու ժամանակ, ողնաշարներ ջարդելու ի՞նչ ժամանակներ էին: 

Բայց ամեն ինչ սկսվեց նրանից, որ Նաիրա Զոհրաբյանն իր ելույթում հայտարարեց, որ իշխանությունը կա'մ պետք է համաձայնագիրը վավերացնի այնպես, ինչպես կա, կա'մ պետք է կոտրի իր սեփական ողնաշարը:

Նաիրա Զոհրաբյանի ելույթին կոշտ արձագանքեց Արմեն Աշոտյանը. «Եթե պետք լինի, այո, պետականաշինության գործընթացի ժամանակ շատ ողնաշարներ կկոտրվեն»:

Բայց այս լեզվակռվի արմատներն ավելի հին են: Սա ոչ թե քաղաքական կռիվ է, այլ անձնական: Բոլորին է հայտնի Արմեն Աշոտյանի և Նաիրա Զոհրաբյանի թշնամության մասին: Հպանցիկ նշենք և այն, որ ըստ չար լեզուների՝ Արմեն Աշոտյանի դեմ գրվող մի շարք հոդվածների հեղինակը նախկին լրագրող Նաիրա Զոհրաբյանն է և այդ մասին գիտի նաև Աշոտյանը: Այդ թշնամության մասին լեգենդներ են պտտվում: Տարիների ընթացքում քավոր-սանիկական հարաբերությունները վերածվեցին թշնամության, և այդ թշնամությունն օգտագործվում է նաև ԱԺ ամբիոնում:

Հայտնի հեքիաթի նման, մեկը մեկին ինչ ասես ասում է՝ մոռանալով տեղն ու պահի կարևորությունը. «Է՛լ հեր ու մեր, է՛լ քաչալ շուն»….

Տեսնելով ԱԺ-ում ընթացող այս լեզվակռիվն ու վիրավորանքը՝ ակամա հիշում ենք «Կարգին հաղորդման» «սկետչերից» մեկը: Դպրոցի միջանցքում երկու հոգի կռվում են: Մեկը մյուսին ասում է՝ լիրբ: Սա նրան՝ լիրբ, մեկը նրան, թե՝ լիրբը դու ես… Մի տարեց մարդ է մոտենում ու ասում. «Կռիվ մի՛ արեք, երկուսդ էլ ճիշտ եք»:

Հիմա Աշոտյանին ու Նաիրա Զոհրաբյանին ուզում ենք ասել՝ կռիվ մի՛ արեք, երկուսդ էլ ճիշտ եք, երկուսդ էլ լիրբ եք…

NEWSPRESS.am