Թուրքական նվերներ հայ մայրիկներին՝ Հերմինե Նաղդալյանից (տեսանյութ, լուսանկար)

Լիկա Թումանյանն իր ֆեյսբուքյան էջում լուսանկար է տեղադրել՝ կից գրելով.

«Ընկերուհիս ապրիլի 7-ին բալիկ է ունեցել: Շենգավիթում: Հանրապետական կուսակցությունն էլ նվեր է արել այդ օրը ծննդաբերած բոլոր կանանց: Լավ նախաձեռնություն է, բարի: Բայց նվերի ծագումնաբանությունը ...ոնց ասեմ, որ մեղմ լինի...սիրուն չի: Ոչ հայեցի է, ոչ էլ հայրենասիրական: Ոչ վայել է, ոչ էլ հարիր: Գոնե պիտակը պոկեիք, էլի...»:

Ֆեյսբուքյան օգտատերը փակագծերը չի բացել, սակայն նվերների հեղինակը պարզից էլ պարզ է: ՀՀԿ կայքում համապատասխան տեսանյութը տեղադրված է, տեղեկատվությունը՝ նույնպես.

«Ավանդաբար կանանց միամսյակի ամենանվիրական օրը՝ապրիլի 7-ին ՀՀԿ կանանց խորհրդի անդամները այցելում են ծննդատներ, շնորհավորում մայրացած կանանց՝ տոնի և երեխայի ծննդի կապակցությամբ: ՀՀԿ կանանց խորհրդի նախագահ Հերմինե Նաղդալյանի գլխավորությամբ՝ ՀՀԿ կանանց խորհրդի անդամներ` Ռ. Մուրադյանը, Ն. Նահապետյանը, Գ. Անտոնյանը, Ջ. Բաղդասարյանը և Ս. Բեգլարյանը, ՀՀԿ տարածքային կազմակերպությունների կանանց խորհուրդների անդամներ այսօր այցելեցին Հաաստանի բոլոր՝ 64 ծննդատները և շնորհավորեցին այս օրերին մայրացած կանանց՝ ողջունելով և նվերներ հանձնելով: Իրենց բարեմաղթանքներում ՀՀԿ կանանց խորհրդի անդամները մայրացած հայ կանանց ցանկացան, որ մեր սերունդները ապրեն խաղաղ պայմաններում, անամպ երկնքի տակ, որ երեխաների մանկությունը լինի անհոգ և երջանիկ, մեր երկիրը անվտանգ լինի, խաղաղ և ստեղծագործ զարգացում ունենա և առաջ ընթանա:

«Սա է մեր մայրերի իղձն ու ձգտումը», - իր խոսքում ընդգծեց Հերմինե Նաղդալյանը` մաղթելով կանանց իղձերի և նպատակների իրականացում:

Երջանիկ մայրությունն բոլորիդ…»: