Զարմինեն, Լապշինն ու Ibis հյուրանոցը. ո՞վ է «անգետը» (ֆոտո)

Օրերս արդարացի դիտարկում էր կատարել ռուս բլոգեր Ալեքսանդր Լապշինը, ով Ֆեյսբուքի իր էջում կիսվել էր Հայաստանում զբոսաշրջությունը խոչընդոտող ծառայությունների բարձր գների հետ կապված մտահոգություններով: Նա, մասնավորապես, ուշադրություն էր դարձրել այն փաստին, թե որքան թանկ են ավիատոմսերը և հյուրանոցները:

«Հարց հայ ընկերներիս: Ասացեք՝ ինչո՞ւ է այդքան թանկ Հայաստան թռչելը: Օրերս ապրիլի վերջի համար տոմս էի փնտրում Երևանից դեպի Փարիզ, և բոլորը՝ մեկ ուղղության համար սկսվում են 250 եվրոյից, և դա դեռ էժան է, և ոչ բոլոր օրերին: Իսկ միջինը՝ մի ուղղությամբ՝ 350 եվրոյից սկսած: Այնուհետև ես նայեցի տարբերակներ Թբիլիսիից, այնտեղ սկսվում է 130 եվրոյից: Արդեն լավ է: Հետո նայեցի Քութայիսիից Wizzair-ով, իսկ այնտեղից Փարիզ մեկ ուղղությունն ընդամենը 50 եվրո արժե»,- գրել է նա:

Այնուհետև Լապշինին պատասխան հարցազրույցով հանդես եկավ ՀՀ տնտեսական զարգացման և ներդրումների նախարարության Զբոսաշրջության պետական կոմիտեի նախագահ Զարմինե Զեյթունցյանը, ով ավելի լավ էր ոչինչ չխոսեր, քան խոսեր և խայտառակեր իրեն:

Հիշում ենք, թե ինչ մեծ ոգևորություն տիրեց հանրության որոշ հատվածում, այն ժամանակ, երբ Զեյթունցյանը նշանակվեց այդ պաշտոնին: Հաջորդ նմանատիպ հարցազրույցից հետո ընդդիմադիրները երևի կսկսեն նաև Զարմինեի հրաժարականը պահանջել:

Զարմինեն իր հարցազրույցում նշել էր, թե Լապշինի ամբողջ գրառումը շատ սիրողական էր, որևէ հստակ տվյալ չկար, կար շատ լուրջ «անգիտություն» թե՛ գների մասին, թե՛ զբոսաշրջիկների քանակի մասին։ Մեկ հոգու օրինակով մի ամբողջ երկրի մասին դատողություն էր արվում։

«Մենք մեր քաղաքականությունն ենք առաջ տանում, նախորդ տարի 18.5 % աճ ենք գրանցել զբոսաշրջության ոլորտում, եթե Լապշինի մայրն այդ 18.5%-ի մեջ չի մտել, դա իր խնդիրն է։ Պատահականություններ լինում են, երբեմն տուր-փաթեթներ են լինում, և Հայաստանի շատ մատչելի տոմս է հայտնվում, մի օր էլ կարող է Իսրայելի շատ մատչելի տոմս հայտնվել։ «Ibis» հյուրանոցի կայքը մի քանի օր առաջ նայում էի՝ 27 հազար դրամով հյուրանոցի համար կա, իսկ Լապշինը գրում է, որ Հայաստանում 50 դոլարով քաղաքի կենտրոնում ոչ մի տեղ չես կարող հանգստանալ»,- ասել էր Զեյթունցյանը։

Երեկ ֆիքսեցինք «Ibis» հյուրանոցի մեկ սենյակի գինը դրսում փակցված ցուցանակի վրա, որտեղ մեկ սենյակի համար ներկայացված ամենամատչելի արժեքը 33.000 դրամ էր: Իհարկե, գին ճշտելու համար ինքներս էլ սիրողական մակարդակի մոտեցում ենք ցուցաբերել, բայց այն, որ Զարմինե Զեյթունցյանն իր ամենավառ երազում անգամ չպետք է պատկերացներ Հյուսիսային պողոտայում գտնվող հյուրանոցային մեկ համարի այդպիսի ցածր արժեք, փաստ է, և այդ 27 հազար դրամի մասին խոսելը պարզապես ակներևէ դարձնում Զարմինեի սիրողական վերաբերմունքը ոլորտին։

NEWSPRESS.am